Nga Arben MALAJ
Apel për përdoruesit e kartave të debitit dhe kreditit:
Mos pranoni kurrë rekomandimin e “ekspertëve” të bankave që, kur nuk arrijnë të zgjidhin një bllokim të kartës suaj, ju propozojnë t’i autorizoni të heqin përkohësisht filtrat e sigurisë së kartës!
Kur unë e pyeta një ekspert bankar se kush do të mbante përgjegjësinë nëse gjatë periudhës – qoftë edhe vetëm 1 sekondë, 1 minutë apo disa ditë – më vidhen para nga karta ime e debitit, ai më dha një përgjigje zhgënjyese.
Vjedhjet gjatë periudhës së heqjes së filtrave të sigurisë, janë përgjegjësia dhe kostoja juaj, sepse ju autorizuat heqjen e filtrave të sigurisë.
Bazuar edhe në përvojën time si bankier, e sqarova qartë se ky rekomandim është jo profesional për dy arsye themelore:
- Heqja e filtrave të sigurisë – edhe për një kohë shumë të shkurtër – rrit ekspozimin ndaj rrezikut të sulmeve kibernetike, të cilat sot janë kërcënim serioz edhe për bankat me nivel shumë të lartë sigurie.
- Zgjidhja e propozuar penalizon klientin, i cili nuk ka faj për problemin teknik të kartës.
Këshilla ime:
Nëse jeni në situata të vështira, brenda ose jashtë vendit, dhe banka ju kërkon të hiqni filtrat e sigurisë, mbani gjithmonë pak para cash me vete (brenda kufijve ligjorë), për të shmangur këtë lëvizje të rrezikshme!
Menaxhoni me kujdes shpenzimet me kartë, sidomos kur udhëtoni, për të evituar skenarët ku detyroheni të hiqni “fashet e sigurisë” të kartës ose të mbeteni pa asnjë mjet tjetër pagese!
Unë personalisht nuk e autorizoj kurrë bankën të heqë filtrat e sigurisë së kartës sime, sepse çdo hakerim apo vjedhje që ndodh gjatë asaj kohe nuk mbulohet nga bankat dhe përgjegjësia bie mbi klientin.
Paratë e vjedhura nuk ju kompesohen.
Mesazhi im mbetet i njëjtë:
Kurrë mos autorizoni heqjen e filtrave të sigurisë së kartës suaj të pagesave, as për një sekondë!
