Presidenti amerikan Donald Trump deklaroi se një numër i madh emigrantësh të paligjshëm punonin në një fabrikë baterish në Georgia, ku autoritetet kryen një nga operacionet më të mëdha të Shërbimit të Imigracionit dhe Doganave (ICE). Megjithëse urdhrat penalë synonin vetëm katër persona, në total u arrestuan 475 punëtorë, shumica prej tyre me origjinë nga Koreja e Jugut. Arrestimet kanë shkaktuar tensione diplomatike dhe valë kritikash brenda dhe jashtë SHBA-së.

Në një tjetër veprim të debatueshëm, Trump firmosi një urdhër ekzekutiv që autorizon përdorimin e emërtimit “Departamenti i Luftës” si alternativë për Departamentin e Mbrojtjes. Edhe pse vendimi nuk është miratuar nga Kongresi, administrata e tij ka bërë të ditur se tituj si “Sekretari i Luftës” do të përdoren tashmë në komunikimet zyrtare, duke ngritur dilema të forta ligjore.

Në planin ndërkombëtar, Trump u përplas me Bashkimin Europian pas gjobës prej 3.46 miliardë dollarësh ndaj kompanisë Google. Ai paralajmëroi një hetim tregtar kundër BE-së, duke e cilësuar vendimin si diskriminues ndaj bizneseve amerikane.

Ndërkohë, raporti i fundit mbi punësimin për muajin gusht solli shifra të zbehta: vetëm 22 mijë vende pune të reja dhe një rritje të normës së papunësisë në 4.3%. Trump u përpoq ta minimizojë situatën, duke thënë se “viti i ardhshëm është ai që ka më shumë rëndësi”.