Më 8 shtator, kryeministri francez François Bayrou do të vërë në lojë përgjegjësinë e qeverisë mbi një deklaratë politike të përqendruar tek borxhi publik. Por ky hap shihet si i destinuar për të dështuar, ndërsa brenda ekzekutivit mbizotërojnë ndjenja të përziera mes moskuptimit dhe zemërimit.

Bayrou, i emëruar kryeministër më 13 dhjetor 2024 pas një përplasjeje të gjatë dhe të vështirë me presidentin Emmanuel Macron, pritet, përveçse nëse ndodh një kthesë e papritur, t’i dorëzojë dorëheqjen presidentit të Republikës në mbrëmjen e 8 shtatorit, pasi nuk do të arrijë të marrë besimin e Asamblesë Kombëtare.

Ky do të ishte një epilog i pakëndshëm dhe aspak i lavdishëm, por që duket se nuk e trondit veçanërisht politikanin nga Bearn-i. “Ka katastrofa më të mëdha në jetë sesa rrëzimi i një qeverie”, deklaroi ai më 5 shtator në një intervistë për radion RTL.

Dorëheqja e tij, nëse konfirmohet, do të shënojë largimin e dytë të një kryeministri francez brenda më pak se një viti, duke thelluar edhe më shumë pasigurinë dhe paqëndrueshmërinë politike të vendit.