Izraeli ka hedhur fletushka nga ajri mbi Gaza City, duke paralajmëruar banorët që të largohen drejt jugut të Rripit të Gazës. Në to shkruhej qartë: “Largohuni, ushtria izraelite po afrohet”, një mesazh që pasqyron intensifikimin e operacioneve ushtarake në qytetin më të madh të enklavës së rrethuar.

Sipas burimeve ndërkombëtare, fletushkat u hodhën kryesisht mbi lagjet perëndimore të qytetit, të cilat tashmë kanë pësuar dëmtime të mëdha nga bombardimet e ditëve të fundit. Paralajmërimi vjen pasi ushtria izraelite ka shkatërruar një numër të madh kullash banimi dhe ka bërë të ditur synimin për të marrë nën kontroll të plotë qendrën urbane.

Por mesazhi ka shkaktuar ankth dhe pasiguri tek civilët. Shumë prej tyre shprehen se nuk kanë ku të shkojnë, pasi edhe zonat e quajtura “humanitare” në jug janë bombarduar më herët. “Na thonë të largohemi, por ku? Nuk ka më vend të sigurt”, tha një banor i zhvendosur.

Analistët e shohin këtë hap jo vetëm si një përpjekje për të shmangur viktimat civile, por edhe si një formë lufte psikologjike, e cila synon të dobësojë moralin e popullsisë dhe të ushtrojë presion mbi të për t’u dorëzuar ndaj kushteve të vështira të konfliktit.