Manchester City dhe Manchester United përballen sot në një nga ndeshjet më të zjarrta të Premier League, me të dyja skuadrat të dëshpëruara për një fitore që do t’i rikthente në garë pas një fillimi jo të mirë të sezonit.
Manchester City dhe Manchester United përballen të dielën në një derbi të hershëm të sezonit të Premier League, me të dyja skuadrat që kërkojnë të lënë pas zhgënjimet e vitit të kaluar.
Ndeshja do të zhvillohet në Etihad Stadium, më 14 shtator, ora 16:30 sipas orës lokale.
Megjithëse të dy klubet kanë shpenzuar shuma marramendëse për sulmues të klasit botëror, këtë herë vëmendja bie mbi portierët. Manchester City ka siguruar Gianluigi Donnarummën nga Paris Saint-Germain, ndërsa Manchester United ka afruar belgjin Senne Lammens në ditën e fundit të merkatos.
Edhe pse United konfirmoi të premten se Lammens nuk do të jetë titullar, sytë e publikut do të jenë tek ata që do të tentojnë të ndalojnë golat, jo tek ata që do t’i shënojnë.
Trajneri i City-t, Pep Guardiola, tha se është gati të përshtasë stilin e lojës së skuadrës pas ardhjes së Donnarummës, duke mos kërkuar prej tij të njëjtat aftësi me topin që kishte Ederson Moraes, i cili u largua javën e kaluar drejt Fenerbahçes pas tetë viteve të suksesshme.
Ederson revolucionarizoi rolin e portierit në futbollin anglez me shpërndarjen dhe teknikat e tij, duke qenë perfekt për filozofinë e Guardiolës. Ndërsa Donnarumma, edhe pse më pak i fortë në pasime, është një mbrojtës i shkëlqyer i portës dhe mund të debutojë në derbin e së dielës.
Rivaliteti mes dy gjigantëve të Manchesterit mbetet një nga më të fortët në Premier League. Për të dyja skuadrat, fitorja në këtë përballje nuk është thjesht çështje pikësh, por edhe prestigji dhe një mundësi për të rikthyer besimin pas një fillimi sezoni jo të shkëlqyer.
