Forcat izraelite zhvillojnë luftime të ashpra rrugë më rrugë në Gaza City, ndërsa banorët përballen me uri dhe rrezik vdekjeje.

Të paktën një duzinë palestinezësh kanë humbur jetën që prej agimit të së mërkurës, ndërsa ushtria izraelite ka intensifikuar pushtimin tokësor në qytetin më të madh të Rripit të Gazës.

Ofensiva, e shoqëruar me bombardime të vazhdueshme dhe luftime rrugë më rrugë, po zhvillohet pavarësisht kritikave në rritje nga komuniteti ndërkombëtar për shkallën e dhunës dhe numrin e lartë të viktimave civile.

Pamje nga terreni tregojnë dhjetëra banorë që përplasen mes tyre për të marrë një vakt ushqimor të shpërndarë nga një organizatë bamirëse, ndërsa uria dhe mungesa e furnizimeve po bëhen gjithnjë e më të rënda në qytetin e rrethuar.

Në një tjetër skenë dramatike, një familje palestineze në Gaza City refuzoi urdhërin e evakuimit nga forcat izraelite, duke deklaruar se preferojnë të qëndrojnë në tokën e tyre, edhe nëse kjo do të thotë të përballen me vdekjen.

Operacionet ushtarake të Izraelit kanë shkaktuar dënime të ashpra nga organizatat ndërkombëtare dhe vendet fqinje, të cilat paralajmërojnë se përshkallëzimi i mëtejshëm do të çojë në një krizë edhe më të rëndë humanitare.