Enceladus, një nga hënat më të ftohta të Saturnit, ka një oqean të fshehur nën akull dhe aktivitet të vazhdueshëm gjeologjik që mund të krijojë kushte të favorshme për jetën.
Një studim i ri i kryer nga një ekip shkencëtarësh të Universitetit të Oksfordit, Institutit të Kërkimeve Jugperëndimore dhe Institutit të Shkencës Planetare në Arizona ka sjellë prova se hëna Enceladus e Saturnit mund të ofrojë kushte të përshtatshme për ekzistencën e jetës. Kjo hënë, e cila ka një diametër prej rreth 500 kilometrash, është e gjashta më e madhja në sistemin e Saturnit.
Hëna duket e akullt dhe e ngrirë nga sipërfaqja, por të dhënat nga misioni Cassini i NASA tregojnë se nën shtresat e akullit ndodhet një oqean i kripur me ujë të lëngshëm. Brenda këtij oqeani ka nxehtësi të mjaftueshme falë procesit të quajtur ngrohje baticore, ku graviteti i Saturnit shkakton shtrirje dhe tkurrje të hënës, duke prodhuar energji termike.
Sipas kërkuesve, oqeani në Enceladus përmban jo vetëm ujë të lëngshëm dhe nxehtësi, por edhe përbërës kimikë të rëndësishëm si fosfori dhe hidrokarburet e kompleksuara, të cilat janë kushte themelore për lindjen e jetës mikrobike.
Studimi thekson se aktiviteti i brendshëm i Enceladus është shumë më i lartë se sa është menduar më parë, duke e bërë këtë trup qiellor një nga kandidatët më premtues për kërkimin e jetës përtej Tokës. Studiuesit shpjegojnë se stabiliteti i energjisë së brendshme të hënës sugjeron se edhe mjedisi nën akull mund të jetë i qëndrueshëm për një periudhë shumë të gjatë kohore, duke krijuar mundësi reale për zhvillimin e organizmave mikroskopikë.
Ky zbulim përforcon besimin se kërkimi i jetës nuk duhet të fokusohet vetëm në planetët me kushte të ngjashme me Tokën, por edhe në hëna të ftohta dhe të mbuluara me akull që fshehin oqeane të tëra në brendësi të tyre.
About the Author
