I dyshuari konsiderohej figurë drejtuese në një rrjet të shpërndarjes së kokainës përgjatë bregdetit jugor të Anglisë.
Një shqiptar 32-vjeçar nga Tirana është arrestuar në Aeroportin “Valerio Catullo” të Veronës, pasi rezultoi i kërkuar me urdhër arresti ndërkombëtar nga autoritetet britanike për trafik të lëndëve narkotike. Arrestimi u bë gjatë një kontrolli rutinë të pasagjerëve, ku Policia Kufitare verifikoi identitetin e tij përmes sistemit TIMS dhe konfirmoi se ndaj tij ishte lëshuar një European Arrest Warrant nga Mbretëria e Bashkuar.
Sipas hetimeve të policisë britanike, i riu dyshohet se kishte rol drejtues në një grup të strukturuar kriminal, i cili merrej me shpërndarjen e kokainës në zonën jugore të Anglisë. Ai nuk ishte thjesht pjesë e logjistikës së rrjetit, por dyshohet se koordinonte njerëzit, paketimin dhe vendosjen e shenjave identifikuese në blloqet e drogës.
Gjatë hetimeve në Britani, autoritetet kishin sekuestruar mbi 28 kilogramë kokainë dhe rreth 175 mijë paund para cash, ndërsa provat e mbledhura përfshijnë edhe porositë online që 32-vjeçari kishte bërë në Itali, mes tyre materiale për paketim, aceton në sasi të mëdha dhe vula druri me simbole identike me ato të gjetura në ngarkesat e sekuestruara.
Pas arrestimit, ai është dërguar në burgun e Veronës, ku do të qëndrojë në pritje të procedurës së ekstradimit drejt Mbretërisë së Bashkuar. Nëse ekstradohet dhe shpallet fajtor, ai përballet me një dënim të rëndë, deri edhe me burgim të përjetshëm.
About the Author
