Monarku spanjoll u prit me nderime nga presidenti Xi Jinping në Pekin, duke shënuar një kapitull të ri në marrëdhëniet dypalëshe mes dy vendeve që këtë vit festojnë 20-vjetorin e partneritetit strategjik.
Mbreti i Spanjës, Felipe VI, ka mbërritur në Pekin për një vizitë shtetërore, e para që nga abdikimi i babait të tij, ish-mbretit Juan Carlos, në vitin 2014. Takimi me presidentin kinez Xi Jinping u zhvillua të mërkurën në Sallën e Madhe të Popullit, ku monarku spanjoll u prit me ceremonitë më të larta shtetërore.
Kjo vizitë shënon rikthimin e një monarku spanjoll në Kinë pas plot 18 vjetësh, pasi vizita e fundit shtetërore e Mbretit Juan Carlos ishte zhvilluar në vitin 2007 gjatë presidencës së Hu Jintao. Juan Carlos, nga ana e tij, ishte bërë mbreti i parë spanjoll që kishte vizituar Kinën që në vitin 1978, duke hapur një faqe të re në marrëdhëniet diplomatike midis dy vendeve.
Gjatë takimit, Xi Jinping e përshëndeti Felipe VI si një “mik të mirë të popullit kinez”, ndërsa të dy liderët theksuan se marrëdhëniet mes Kinës dhe Spanjës janë forcuar ndjeshëm, duke u bazuar mbi besim dhe bashkëpunim ekonomik. Monarku spanjoll nënvizoi se është krijuar “një marrëdhënie e qëndrueshme besimi” mes Madridit dhe Pekinit, të cilat këtë javë festojnë 20-vjetorin e ngritjes së marrëdhënieve dypalëshe në nivel të lartë.
Në delegacionin spanjoll mori pjesë edhe Mbretëresha Letizia, dhe çifti mbretëror udhëtoi me limuzinë drejt ceremonisë zyrtare në zemër të kryeqytetit kinez. Në pritje ishin gjithashtu ministri i jashtëm Wang Yi dhe ministri i tregtisë Wang Wentao, të cilët bashkë me monarkun diskutuan për mundësi të reja bashkëpunimi ekonomik dhe kulturor.
Kina mbetet partneri më i madh tregtar i Spanjës në Azi dhe i katërti më i rëndësishëm në shkallë globale, sipas të dhënave të Familjes Mbretërore Spanjolle. Vizita e Felipe VI pritet të shërbejë si një sinjal i qartë për forcimin e marrëdhënieve mes dy vendeve në një moment ku diplomacia ekonomike luan një rol vendimtar në skenën ndërkombëtare.
About the Author
