Aktori i famshëm rrëfen deklaratën e guximshme të vitit 1988, kur nga skena e Oscars akuzoi Akademinë për mungesë përfaqësimi, ndërsa promovon dokumentarin e ri Being Eddie.
Eddie Murphy është rikthyer tek një nga momentet më të forta të karrierës së tij: nata e vitit 1988, kur në skenën e Oscars kritikoi hapur Akademinë për mosvlerësimin e aktorëve afro-amerikanë. Gjatë një interviste për Entertainment Weekly, teksa promovonte dokumentarin e tij të ri për Netflix, Being Eddie, ai kujtoi çastet e tensionuara që paraprinë deklaratën.
Murphy tregoi se pak para se të dilte në skenë për të prezantuar çmimin për filmin më të mirë, ai i rrëfeu Robin Williams-it atë që do të thoshte. Williams u tregua skeptik, duke e pyetur pse do ta bënte një deklaratë të tillë. Por Murphy kishte vendosur: donte të ishte i sinqertë, i drejtpërdrejtë dhe njëkohësisht komik, pa humbur mesazhin.
Në skenë, Murphy kujtoi fjalët e menaxherit të tij që e kishte shtyrë të pranonte ftesën për të prezantuar. Ai i tha publikut se fillimisht kishte refuzuar të merrte pjesë sepse Akademia nuk i kishte njohur meritat e artistëve të zinj. Pastaj shtoi, me humor dhe provokim, se ndoshta nuk do të fitonte kurrë një Oscar pas kësaj deklarate, por ia vlente ta thoshte.
Në atë kohë, vetëm tre aktorë të zinj kishin fituar një Oscar: Hattie McDaniel, Sidney Poitier dhe Louis Gossett Jr. Murphy vuri në dukje boshllëqet e mëdha mes viteve të fitoreve, duke theksuar se është e papranueshme që afro-amerikanët të trajtohen si të dorës së dytë në industrinë e filmit. Ai e mbylli deklaratën me një mesazh të fuqishëm: aktorët e zinj duhen njohur, respektuar dhe nuk duhet të mbeten në bisht të shoqërisë.
Murphy tregoi se atë natë nuk u shqetësua për reagimet. Ai mendoi se deklarata do të përmbyte mediat, por për habinë e tij jehona ishte minimale. Megjithatë, vetëm dy vite më vonë, Denzel Washington fitoi Oscar-in për rolin në Glory.
Edhe pse ka një karrierë të gjatë dhe të nderuar, Murphy nuk ka fituar ende një Oscar. Ai iu afrua më shumë çmimit në vitin 2007 me Dreamgirls, por statueta i shkoi Alan Arkin për Little Miss Sunshine. Mediat e kohës spekuluan se filmi Norbit, i kritikuar ashpër dhe i publikuar pak para votimit, mund të ketë ndikuar negativisht te votuesit.
Murphy mbetet indiferent ndaj kritikave. Ai ka mbrojtur vazhdimisht filmin, duke thënë se e pëlqen Norbit dhe madje ka bërë shaka edhe me çmimet Razzies që mori.
Dokumentari i tij i ri, Being Eddie, publikohet më 12 nëntor në Netflix dhe pritet të hedhë dritë mbi karrierën, sfidat dhe momentet e patreguara që kanë ndërtuar një nga figurat më të dashura të komedisë amerikane.
About the Author
