Sulmuesi, i njohur më herët për dhunë në familje, u plagos nga policia dhe u dërgua në spital; një kalimtar u godit aksidentalisht gjatë të shtënave
Një incident i rëndë ka ndodhur këtë të premte në stacionin hekurudhor Montparnasse në Paris, ku policia ka qëlluar dhe plagosur një burrë të armatosur me thikë, i cili pak më herët kishte kërcënuar se do të vriste gruan dhe fëmijët e tij.
Sipas Prokurorisë së Parisit, policia ishte informuar se i dyshuari po udhëtonte me tren drejt kryeqytetit dhe kishte bërë kërcënime serioze ndaj familjes së tij. Oficerët ishin pozicionuar në stacion për ta arrestuar, por sapo pa policinë, burri nxori thikën dhe filloi t’i shkaktonte vetes plagë.
Në përpjekje për ta neutralizuar, policët hapën zjarr dy herë, duke e qëlluar në këmbë. Gjatë ndërhyrjes, një kalimtar u plagos aksidentalisht në këmbë, por fatmirësisht pa rrezik për jetën.
Sipas dëshmitarëve, në stacion shpërtheu panik i madh. Pas të shtënave, turma u shpërnda me shpejtësi, ndërsa policia urdhëroi evakuimin e plotë të objektit – një nga nyjet kryesore të trenave me shpejtësi të lartë drejt Francës perëndimore dhe jugperëndimore.
I dyshuari u dërgua në spital me plagë jo kërcënuese për jetën. Hetimet po vazhdojnë, ndërsa incidenti ndodh vetëm një ditë pas 10-vjetorit të sulmeve terroriste në Bataclan, një periudhë kur tensionet dhe vigjilenca janë shtuar ndjeshëm në kryeqytetin francez.
About the Author
