Familja turke që jetonte në Gjermani u shtrua me urgjencë në spital pas konsumimit të ushqimit në një zonë turistike të Stambollit, ndërsa hetimet çuan në arrestime dhe evakuim të hotelit.
Një ngjarje e rëndë ka tronditur Stambollin, pasi tre anëtarë të një familjeje turistike humbën jetën si pasojë e një helmimi të dyshuar. Familja, me origjinë turke dhe me banim në Gjermani, kishte shkuar për pushime në qytetin historik dhe, sipas autoriteteve, u sëmurën menjëherë pas konsumimit të ushqimit të rrugës në zonën e njohur të Ortakoy.
Të katër anëtarët u dërguan në spital, por dy fëmijët e moshës 3 dhe 6 vjeç ndërruan jetë të enjten, ndërsa nëna e tyre humbi jetën të premten, njoftoi Ministria e Drejtësisë në Turqi. Babai i fëmijëve mbeti i gjallë dhe po trajtohet.
Mediat turke kanë raportuar se familja dyshohet të ketë konsumuar midhje dhe patate të mbushura nga shitës ambulantë. Restoranti ku ata darkuan u mbyll menjëherë për hetime, ndërsa autoritetet kërkuan analizimin e mostrave të ushqimeve të konsumuara.
Rasti u komplikua më tej kur dy turistë të tjerë, që ishin akomoduar në të njëjtin hotel, u shtruan sot në spital me simptoma të ngjashme si të përziera dhe të vjella. Hetimet në hotel zbuluan se një dhomë në katin përdhes ishte spërkatur së fundmi me pesticide, një fakt që ngriti dyshime për ndotje të mundshme të mjedisit.
Policia ka arrestuar një punonjës hoteli dhe dy punonjës të kontrollit të insekteve, duke e çuar numrin total të të ndaluarve në shtatë persona. Më herët, katër të tjerë ishin vënë në pranga në lidhje me rastin.
Autoritetet evakuuan të gjithë mysafirët e hotelit, të cilët u transferuan në akomodime të tjera të sigurta, ndërsa nuk është bërë ende publike sa persona janë prekur gjithsej nga incidenti.
Rasti ka ngritur shqetësime të mëdha për sigurinë ushqimore dhe standardet e dezinfektimit në zonat turistike të qytetit, ndërsa hetimet po vijojnë në disa pista.
About the Author
