Këngëtari dhe kantautori që ndikoi thellë në skenën alt-country dhe Americana ndahet nga jeta pas një diagnostikimi të fundit me pneumoni.
Todd Snider, një nga figurat më të dashura dhe më të veçanta të muzikës amerikane alternative, ka ndërruar jetë të premten në moshën 59-vjeçare. Lajmi u konfirmua nga Rolling Stone, ndërsa ende nuk është bërë publik shkaku zyrtar i vdekjes. Sipas raportimeve, artisti ishte diagnostikuar me pneumoni pak ditë para se të ndërronte jetë.
Snider u lind në Portland të Oregonit dhe pas shkollës së mesme u zhvendos në Kaliforninë veriore. Në vitet ’80 ai u vendos në Teksas, ku njihet me mentorin e tij të parë, Jerry Jeff Walker. Më pas, në vitet ’90, ai u transferua në Nashville, duke u bërë një nga zërat kryesorë të skenës së ashpër, të ndjerë dhe të sinqertë të East Nashville.
Albumi i tij i vitit 2004, East Nashville Skyline, konsiderohet një gur themeli i muzikës alt-country dhe një referencë e domosdoshme për muzikantët e brezave të rinj.
Snider njihej për stilin bohem, jetën nomade dhe aftësinë unike për të treguar histori përmes këngëve. Ai e përshkruante veten si një udhëtar të përjetshëm, dikush që jetonte me kitarë në shpinë dhe aventura në gjak. Sipas tij, diferenca mes një shpirt-të-lirë dhe një “freeloader” ishin ato tre akorde në kitarë që e bënë të famshëm.
Gjatë karrierës ai u miqësua dhe u frymëzua nga emra legjendarë të kantautorëve amerikanë si John Prine, Billy Joe Shaver, Guy Clark, Kris Kristofferson dhe Jimmy Buffett. Humbja e shumë prej tyre la një boshllëk të madh në jetën e tij artistike, të cilin ai vetë e rrëfente shpesh në këngë.
Albumi i tij i fundit, High, Lonesome and Then Some, i publikuar në vitin 2025, shënoi një reflektim të thellë mbi jetën, humbjet dhe miqësitë e tij të zhdukura.
Me vdekjen e Todd Snider, komuniteti i muzikës Americana humbet një tregimtar të rrallë, një poet të skenës alternative dhe një njeri që e jetoi muzikën po aq fort sa e krijoi.
About the Author
