Zoti kryeministër eja në Smokthinë”, “Zëri i Velçës nuk shuhet”. Me këto pankarta në duar dhe të indinjuar nga mungesa e infrastrukturës, banorët e Lumit të Vlorës u ngritën sot në protestë për rreth 1 orë. Ata bllokuan 30 minuta qarkullimin në rrugën e Lumit të Vlorës.

Rreth 150 banorë nga fshatrat Verbas, Matogjin, Bashaj, Vërmik, Ramicë dhe Velçë, kanë kërkuar me një zë kthimin e vëmendjes nga pushteti qendror dhe ai lokal, që sipas tyre duhet të rikthejë sytë nga kjo krahinë, duke apeluar për rikonstruksionin e rrugës e cila, prej 35 vitesh, është lënë në harresë pa asnjë ndërhyrje. “Kjo protestë na përket ne dhe vetëm në 35 vite, kjo krahinë në mjerim, në harresë.

“Si ka mundësi që 35 vite ne kemi qenë të harruar, të pavlerësuar? Si ka mundësi që pushteti vendor dhe qendror heshtin para nesh?”, tha një prej protestuesve.

Për të përshkuar vetëm 25 kilometra, deri në pikën fundore të këtyre fshatrave, banorëve u duhet rreth 2 orë. Ata shprehen se investimi i rrugës ishte një premtim elektoral, por tashmë është lënë në harresë. Banorët i bënë thirrje kryeministrit Edi Rama dhe deputetëve të qarkut që të mos vijnë në zonë vetëm në kohë fushatash, duke bërë premtime që më pas nuk realizohen.

“Kaluan disa muaj dhe kjo mbeti në harresë. Ku të besojmë, ku të shkojmë e ta kërkojmë këtë të drejtë? Të vetmen mundësi që kemi, ne duhet të protestojmë derisa të zgjedhim të vërtetën tonë. Protesta jonë paqësore ka si bashkëpunim me pushtetin lokal e qendror që të kthejnë sytë nga ne dhe të na bëjnë rrugën. Këta po tallen me ne dhe duan të tallen me ne” – tha një banor.

Në protestën e zhvilluar, banorët u shprehën se janë të kënaqur me rrugën e Lumit të Vlorës që është shtuar, por të pakënaqur nga qeveria, e cila sipas tyre i ka lënë në harresë këto fshatra. Ata theksuan se investimi në këtë rrugë do të sillte zhvillim për zonën, duke i kthyer këto fshatra në mundësi ekonomike dhe atraksion turistik. Njëzëri ata thonë se duan të investojnë sepse zona e tyre ka potencial të madh për turizmin malor, por kanë mbetur të izoluar për shkak të infrastrukturës.

“I bëj thirrje qeverisë, bëj studim Shqipërisë, bëj studim Lumit të Vlorës, se ngrihen resorte që do i vizitojë Europa, jo Shqipëria vetëm. Kemi paguar taksa 35 vite, ku janë paratë tona, ku janë lekët tona?” -shprehen banorët.

Banorët kërkojnë nisjen e një dialogu me pushtetin vendor dhe qendror dhe një angazhim konkret për zhvillimin e zonës dhe përmirësimin e infrastrukturës. Në protestën paqësore nuk mungoi as muzika popullore, ndërsa banorët paralajmëruan se, nëse nuk do të ketë reagim nga qeveria, protesta e radhës do të mbahet brenda muajit shtator. Në protestë pati edhe prani të policisë për të shmangur çdo incident të mundshëm.