Prurjet kanë arritur në 5 metra, ndërsa rreziku shtohet nëse lumi i afrohet kufirit kritik prej 7.5 metrash
Niveli i ujit në lumin Vjosë ka pësuar rritje të qëndrueshme gjatë orëve të fundit, duke arritur në 5 metra në zonën e Novoselës. Edhe pse aktualisht situata paraqitet e qetë dhe lumi ende nuk ka dalë nga shtrati, autoritetet po ndjekin nga afër ecurinë e prurjeve për shkak të mundësisë së rrezikut në vijim.
Sipas vlerësimeve teknike, nëse niveli i ujit arrin 7.5 metra, lumi rrezikon të dalë nga shtrati dhe të përmbytë zonën e tregut të vjetër të Mifolit, një prej pikave më të ekspozuara gjatë rritjeve të mëdha të prurjeve.
Strukturat përgjegjëse kanë ngritur monitorim të pandërprerë përgjatë gjithë segmentit të lumit, duke paralajmëruar se çdo ndryshim i shpejtë në nivelin e ujit do të trajtohet me masa emergjente. Ekipet e mbrojtjes civile dhe mjetet e nevojshme janë vënë në gatishmëri për të ndërhyrë në rast të ndonjë përkeqësimi të situatës.
Parashikimet e motit dhe shkrirjet e mundshme në zonat malore mbeten faktorë kyç që mund të ndikojnë në rritjen e mëtejshme të nivelit të Vjosës.
About the Author
