Dukesha e Sussex kundërshton pretendimet për mbajtjen pa leje të fustanit të markës Galvan, pasi u shfaq sërish me veshjen në një video promocionale në Netflix.
Meghan Markle ka reaguar fuqishëm ndaj akuzave të reja që qarkulluan ditët e fundit, ku pretendohej se ajo kishte mbajtur pa autorizim një fustan të markës Galvan gjatë një seti fotografik në vitin 2022. Zërat u ringjallën kur ajo u shfaq sërish me të njëjtin fustan smerald në një video promovuese për projektin e saj të ri festiv në Netflix.
Sipas akuzave, veshja me vlerë rreth 1300 paund nuk ishte kthyer te stilistët pas xhirimeve, megjithëse kjo praktikë nuk lejohet zakonisht pa një marrëveshje të qartë. Ekipi i Meghan e ka hedhur kategorikisht poshtë historinë, duke e cilësuar shpifëse dhe të pavërtetë. Përfaqësuesit e saj u shprehën se çdo artikull i mbajtur është marrë vetëm me transparencë të plotë dhe në përputhje me kontratat e setit fotografik.
Burime pranë industrisë së modës sqarojnë se personazhet e profilit të lartë, përfshirë anëtarët e Familjes Mbretërore, shpesh mbajnë disa nga veshjet për arsye sigurie, për të shmangur shitjen apo ankandimin e tyre të mëvonshëm pa autorizim.
Rikthimi i fustanit në videon promocionale ndezi sërish diskutimin, i cili u nxit edhe nga një podcast amerikan dhe një artikull i New York Post, që përsëritën pretendimet e vjetra për “moskthim” të disa veshjeve nga fotosesione të ndryshme. Kritikët e lidhën këtë me një episod të përmendur në një libër biografik të vitit 2022, ndërsa disa media rozë thanë se fustani i Galvan ishte marrë pa pyetur.
Pavarësisht zhurmës, burime të afërta me ekipin e Sussex theksojnë se gjithçka ka qenë e rregullt dhe se praktika është jo vetëm e zakonshme, por edhe e miratuar nga ekipet stilistike që menaxhojnë garderobën e personave publikë.
Seria e re festive e Meghan Markle në Netflix pritet të publikohet muajin e ardhshëm, ndërsa debati për fustanin vazhdon të qarkullojë në mediat britanike.
About the Author
