42-vjeçari u fut nga çatia e qendrës tregtare gjatë ndërprerjes masive të energjisë dhe mbylli grabitjen rekord prej 4 minutash, përpara se të zhdukej drejt Evropës Lindore.
Shamir Hoxha, një emër i njohur për policitë europiane, është arrestuar në Madrid pas një grabitjeje spektakolare të kryer gjatë Apagonit të Madh të 28 prillit 2025. Ndërprerja masive e energjisë elektrike paralizoi një pjesë të madhe të Spanjës, duke lënë qendrën tregtare Plaza Norte 2 në San Sebastián de los Reyes pa sistem sigurie. Pikërisht këtë moment shfrytëzoi 42-vjeçari shqiptar për të ekzekutuar një nga grabitjet më të sofistikuara të viteve të fundit.
Sipas hetimeve, Hoxha kishte studiuar prej javësh strukturën e qendrës. Ai u ngjit në çatinë e jashtme, preu shtresën asfaltike dhe krijoi një hyrje të fshehtë mbi bizhuterinë José Luis. Pasi hapi tavanin e brendshëm dhe kaloi nëpër një korridor shërbimi, arriti të zbresë drejtpërdrejt në ambientet e lokalit, ku vitrinat elektronike ishin të pajisura me alarm, por të gjitha të çaktivizuara nga mungesa e energjisë.
Me një mjet të thjeshtë, ai hapi xhamat mbrojtës dhe sekuestroi rreth 2200 bizhuteri, mes tyre një koleksion të çmuar ari të bardhë me gurë të shtrenjtë. Gjithçka zgjati vetëm katër minuta. Më pas u largua në këmbë drejt një makine të blerë paraprakisht dhe la Spanjën ditën tjetër, duke u zhdukur në Rumani ku braktisi automjetin.
Policia filloi ndjekjen ndërkombëtare duke analizuar kamerat e mbetura funksionale të qendrës dhe lëvizjet e automjetit. Me bashkëpunim të autoriteteve rumune dhe shqiptare, hetimet zbuluan të gjitha hyrjet dhe daljet e tij nga territori spanjoll, duke e çuar te arrestimi i 22 tetorit 2025. Në momentin e kapjes, Hoxha kishte ende në qafë një nga bizhuteritë e vjedhura dhe mbi 3000 euro në para të gatshme.
Kush është Shamir Hoxha?
I lindur në Tiranë dhe i lëvizur shpesh mes Spanjës, Italisë dhe Francës, ai është i njohur për grabitje të planifikuara me kujdes, mashtrime teknologjike dhe operacione të sofistikuara brenda tregut të zi të Evropës. Flet pesë gjuhë, ndërrohet shpesh identitet dhe njihet për faktin se nuk përdor armë, duke preferuar precizion dhe fshehtësi.
Hetimet zbuluan se për ta realizuar grabitjen e Apagonit, ai përdori një gjenerator të vogël portativ, mjete të specializuara dhe njohuri të detajuara mbi infrastrukturën e qendrës tregtare. Megjithëse policia ka gjetur vetëm një pjesë të vogël të parave dhe bizhuterive, pjesa më e madhe e mbi 1.2 milionë eurove të vjedhura mendohet se është trafikuar në tregjet e Europës Lindore.
Hoxha ndodhet aktualisht në burgun Soto del Real në Madrid, në pritje të gjyqit./Periodista Digital
About the Author
