Pesë vjet pas pandemisë së koronavirusit, një paralajmërim i ri global vjen nga Instituti Pasteur, i cili ngre shqetësimin për rrezikun e një pandemie të mundshme të shkaktuar nga virusi i gripit të shpendëve, raporton Reuters. Sipas ekspertëve, nëse virusi pëson mutacione që i mundësojnë transmetimin nga një person te tjetri, pasojat mund të jenë edhe më të rënda se COVID-19.
Aktualisht, gripi i shpendëve vazhdon të qarkullojë te shpendët e egër, shpendët e fermave dhe disa lloje gjitarësh, duke shkaktuar humbje të mëdha në tufa dhe ndërprerje në zinxhirin e furnizimit ushqimor. Infeksionet te njerëzit kanë qenë të rralla, por Instituti Pasteur paralajmëron se përshtatja e virusit për transmetim të qëndrueshëm mes njerëzve do të ishte “skenari që duhet të shmanget me çdo kusht”.
Drejtoresha mjekësore e qendrës së infeksioneve të frymëmarrjes, Marie-Anne Rame Velti, shpjegon se virusi mund të përshtatet te gjitarët dhe sidomos te njerëzit, duke fituar aftësi të ngjashme me viruset e zakonshme të gripit. Ajo shton se, ndryshe nga COVID-19 që goditi grupet vulnerabël, gripi i shpendëve mund të infektojë edhe njerëz të shëndetshëm, përfshirë fëmijët — duke rritur rrezikun e vdekshmërisë.
Historikisht, qindra raste infeksionesh njerëzore janë raportuar nga llojet H5N1 dhe më së fundi H5N5 në SHBA. Të dhënat e OBSH tregojnë se që nga viti 2003 janë regjistruar afro 1,000 shpërthime te njerëzit, me shkallë të lartë fataliteti në vende si Egjipti, Indonezia dhe Vietnami.
Megjithë paralajmërimet, ekspertët theksojnë se probabiliteti për një pandemi të re mbetet i ulët. Gregorio Torres nga Organizata Botërore për Shëndetin e Kafshëve thekson rëndësinë e vigjilencës dhe përgatitjes së hershme, duke sqaruar se aktualisht nuk ka nevojë për kufizime në jetën e përditshme.
Sipas Rame Velti, komuniteti shkencor është më i përgatitur se kurrë falë eksperiencës së COVID-19: ekzistojnë masa parandaluese, kandidatë të gatshëm për vaksina dhe rezerva antiviralesh që mund të aktivizohen menjëherë në rast të një emergjence të re
About the Author
