Sipas mjekëve, një dron goditi civilët pranë një shkolle në Bani Suheila, përtej zonës së ndaluar nga marrëveshja e tetorit.
Dy fëmijë palestinezë kanë humbur jetën në jug të Rripit të Gazës pasi një sulm me dron goditi zonën e Bani Suheila-s, në lindje të Khan Younis. Të pranishmit treguan se shpërthimi ndodhi pranë shkollës al-Farabi, ku një bombë u lëshua mbi një grup civilësh gjatë orëve të mëngjesit. Viktimat, dy djem vëllezër, Juma dhe Fadi Tamer Abu Assi, u dërguan me urgjencë në kompleksin spitalor Nasser, por mjekët nuk arritën t’i shpëtojnë.
Burime lokale theksuan se zona ku ndodhi sulmi ndodhet jashtë vijës së verdhë, kufiri i përcaktuar nga marrëveshja e armëpushimit e 10 tetorit, çka e ka rritur shqetësimin për shkeljet e përsëritura të paktit. Ndërkohë, edhe më herët gjatë ditës, ushtria izraelite ndërmori operacione tokësore, detare dhe ajrore në disa pjesë të Gazës.
Sulme të tjera u raportuan në al-Qarara, ku tre palestinezë u plagosën pas bombardimeve, si dhe në lagjen Tuffah në qytetin e Gazës, ku avionët izraelitë goditën disa ndërtesa. Goditje u shënuan gjithashtu në lindje të Rafahut, duke shtuar frikën e banorëve të dëshpëruar nga cikli i pandërprerë i dhunës.
Incidenti vjen një ditë pasi spitali Nasser njoftoi vdekjen e një palestinezi tjetër të qëlluar nga një dron izraelit në të njëjtën zonë, gjithashtu përtej vijës së verdhë. Që nga fillimi i ofensivës në tetor 2023, numri i viktimave palestineze ka kaluar 70 mijë, shumica gra dhe fëmijë, ndërsa mbi 170 mijë të tjerë janë plagosur.
Përfaqësues të Hamasit apelojnë që komuniteti ndërkombëtar të ushtrojë presion ndaj Izraelit për respektimin e armëpushimit, teksa tensionet në terren vazhdojnë të përshkallëzohen.
About the Author
