Stuhia shkatërrimtare ka rrënuar mijëra banesa, ka lënë dhjetëra mijëra të pastrehë dhe ka detyruar autoritetet të shpallin apel global për ndihmë urgjente.
Sri Lanka ka shpallur alarm kombëtar teksa bilanci tragjik i ciklonit Ditwah është rritur në 132 të vdekur, ndërsa mbi 170 persona rezultojnë ende të zhdukur. Autoritetet shtetërore raportojnë se rreth 15 mijë shtëpi janë shkatërruar nga shirat e dendur dhe përmbytjet masive që kanë goditur vendin gjatë ditëve të fundit.
Sipas Qendrës së Menaxhimit të Fatkeqësive, afërsisht 44 mijë njerëz janë detyruar të braktisin banesat dhe të strehohen në qendra të përkohshme të drejtuara nga shteti, teksa operacionet e shpëtimit janë intensifikuar me mijëra pjesëtarë të ushtrisë, marinës dhe forcave ajrore.
Edhe pse cikloni po zhvendoset drejt Indisë, rreziku mbetet i lartë. Në rajonin qendror të Kandy-t janë regjistruar rrëshqitje të reja dhe disa akse rrugore janë zhytur nën ujë. Reshjet e pandërprera kanë përkeqësuar situatën humanitare, duke e bërë të vështirë arritjen e ekipeve të shpëtimit tek personat e bllokuar.
Zyrtarët e Kryqit të Kuq në Sri Lanka paralajmërojnë se situata mund të rëndohet më tej, pasi niveli i ujit vazhdon të rritet në disa zona. Sipas tyre, qindra njerëz janë ende të izoluar dhe presin ndihmë.
Për shkak të përmbytjeve, autoritetet kanë lëshuar urdhër-evakuime përgjatë lumit Kelani, i cili doli nga shtrati të premten në mbrëmje duke detyruar qindra familje të kërkojnë strehim emergjent.
Qeveria e Sri Lankës ka kërkuar zyrtarisht ndihmë ndërkombëtare dhe u ka bërë apel edhe shtetasve të saj jashtë vendit të kontribuojnë financiarisht për të mbështetur afro gjysmë milioni persona të prekur. India ishte vendi i parë që reagoi, duke dërguar dy aeroplanë me furnizime emergjente, ndërsa një anije luftarake indiane, e ndodhur në Kolombo, dha rezervat e saj ushqimore për të ndihmuar popullsinë.
Shirat janë zbutur në disa rajone, por veriu i vendit vazhdon të përjetojë mot të paqëndrueshëm. Autoritetet paralajmërojnë se niveli i përmbytjeve mund të tejkalojë atë të vitit 2016, kur Sri Lanka humbi 71 njerëz në ngjarje të ngjashme.
About the Author
