Përgjimet e dosjes së SPAK zbulojnë bisedat e Igli Haxhiajt me anëtarët e rrjetit të trafikut të drogës dhe rolin e tij në negociatat për mallin që vinte nga Amerika Latine drejt tregut europian.
Operacioni i SPAK që çoi në goditjen e një grupi kriminal të trafikut të drogës mes Amerikës Latine, Shqipërisë dhe Italisë ka zbuluar detaje të reja për përfshirjen e efektivit të Antiterrorit Igli Haxhiaj. Sipas dosjes, ai dyshohet se bashkëpunonte ngushtë me grupin e drejtuar nga Elvis Doçi, duke ofruar informacion të ndjeshëm dhe duke marrë pjesë në negociata për lëndë narkotike.
Përgjimet tregojnë biseda të drejtpërdrejta mes Haxhiajt dhe anëtarëve të rrjetit, ku diskutoheshin cilësia, çmimet dhe sasia e mallit. Në një komunikim të vitit 2020, ai shfaq interes për mallin që i dërgohej me foto, duke e vlerësuar dhe kërkuar mostra për testim. Sipas dosjes, ai kërkonte dy gram për prova dhe interesohej nëse malli ishte i pastër dhe i nivelit të kërkuar.
Në bisedat e vitit 2023, Haxhiaj kërkon mall të mirë me çmim, ndërsa bashkëbiseduesit i ofrojnë sasi të destinuara për tregun holandez me çmime nga 25 deri në 29 mijë euro. Edhe pse çmimi i dukej i lartë, ai shfaqet i gatshëm të marrë lëndën, ndërsa kontaktet i propozojnë ndryshime çmimi dhe mostra testimi.
Sipas hetuesve, këto komunikime përbëjnë prova të rolit të tij aktiv në trafikun ndërkombëtar, duke përfshirë negocim çmimesh, sigurim malli, testime dhe lidhje me rrjetin kriminal që operonte në disa shtete.
Në dosje janë përfshirë edhe kodet e përdorura gjatë komunikimit, të cilat SPAK i konsideron si të lidhura drejtpërdrejt me Haxhiajt dhe personat që furnizonin rrjetin.
About the Author
