Roli i padukshëm i Robbie Gibb, ndërhyrjet politike, ndikimi në Brexit, në mbulimin e Gazës dhe ndikimi i tij në vendimet editoriale çuan drejt dorëheqjeve dhe kolapsit të besueshmërisë së transmetuesit publik britanik.
BBC po kalon një nga krizat më të thella që ka përjetuar ndonjëherë, pas dorëheqjes së drejtorit të përgjithshëm Tim Davie dhe drejtoreshës së lajmeve Deborah Turness. Shkak u bë transmetimi dhe më pas tërheqja e një materiali të redaktuar të gabuar nga një fjalim i Donald Trump, por sipas shumë gazetarëve britanikë, problemi nuk nisi aty. Në qendër të krizës është një figurë që për vite të tëra ka ushtruar ndikim të padukshëm, por vendimtar: Robbie Gibb.
Roli i Gibb ka qenë i pranishëm në BBC dhe politikën britanike për mbi një dekadë, duke lëvizur midis institucioneve si një njeri i prapaskenës që formësonte mbulimin politik sipas një axhende të vetën. Ai ka qenë drejtues i politikës në BBC, shef komunikimi në Downing Street dhe më pas anëtar i bordit të BBC, ku ndikimi i tij u bë edhe më i fortë. Sipas shumë gazetarëve që kanë punuar me të, Gibb kishte ndikim të drejtpërdrejtë në mënyrën se si mbulohej Brexit, Donald Trump dhe më vonë lufta në Gaza.
Ish-redaktori i Channel 4 News, Ben de Pear, tregon se si gjatë viteve të punës së tij, Gibb kufizonte aksesin e gazetarëve kritikë ndaj qeverisë, veçanërisht pas raportimeve që ekspozuan skandalin Windrush dhe trajtimin e qytetarëve britanikë me prejardhje nga Karaibet. Gibb përdorte rolin e tij politik për të ndëshkuar media të caktuara, ndërsa BBC gëzonte akses të privilegjuar falë lidhjeve të tij të ngushta me gazetarët e brendshëm.
Shumë gazetarë të BBC e kanë përshkruar Gibb si figurën që, edhe kur nuk ishte fizikisht në ndërtesën e BBC, vazhdonte të ndikonte në vendimet editoriale, duke ushtruar presion mbi drejtues e gazetarë që të moderonin kritikat ndaj qeverisë konservatore. Emri i tij lidhet me mbulimin e debatueshëm të referendumit të Brexit, ku BBC sipas kritikëve u tregua më e butë ndaj fushatës Leave dhe figurave si Nigel Farage.
Prej vitit 2019, si anëtar i bordit të BBC, Gibb nuk kishte rol formal editorial, por vazhdonte të ndikonte në vendimet kyçe, deri te përpjekjet për të bllokuar emërime të caktuara dhe ndërhyrjet në mënyrën se si duhej mbuluar Gaza. Pas fillimit të ofensivës së Izraelit në 2023, presioni mbi drejtuesit e BBC për mënyrën e raportimit u rrit. Sipas burimeve të brendshme, Gibb ka qenë një nga figurat kryesore që ndikuan në vendimin për të vonuar ose frenuar transmetimin e një dokumentari për sulmet ndaj mjekëve dhe spitaleve në Gaza. Dokumentari u transmetua vetëm pasi Channel 4 e publikoi vetë, ndërsa BBC refuzoi ta shfaqte versionin e plotë.
Krisja e madhe erdhi me skandalin e Panorama, kur një pjesë e redaktuar gabimisht e një fjalimi të Tramp u transmetua si material zyrtar. Reagimi i vonuar i BBC, presioni politik dhe ndikimi i Gibb sollën shkarkime, debate të ashpra publike dhe një krizë të besueshmërisë që kulmoi me dorëheqje.
Sot, Gibb shihet si figura që, në përpjekje për të luftuar atë që ai e quante dominim liberal brenda BBC, e çoi transmetuesin drejt një kolapsi editorial, një beteje ligjore prej mbi një miliard dollarësh me një president amerikan dhe një humbje të thellë të besimit publik. Për shumë analistë, kjo është prova më e qartë se ndikimi i padukshëm i një njeriu në mediat publike mund të ndryshojë rrjedhën e raportimit kombëtar.
About the Author
