Presidenti amerikan rrit presionin ndaj Nicolas Maduro mes akuzave për trafik droge, lëvizje ushtarake në Karaibe dhe paralajmërimeve për ndërhyrje të mundshme.
Presidenti i Shteteve të Bashkuara Donald Tramp ka deklaruar se hapësira ajrore mbi dhe rreth Venezuelës do të konsiderohet e mbyllur në mënyrë të plotë, duke ndezur edhe më shumë tensionet me qeverinë e Nicolas Maduro. Mesazhi u publikua në platformën e tij Truth Social dhe vjen pas disa javësh retorike të ashpër nga zyrtarët amerikanë kundër Caracasit.
Autoritetet venezueliane nuk kanë reaguar menjëherë, por njoftimi është cilësuar si një hap i rëndë që shton frikën për një ndërhyrje të mundshme amerikane. Paralelisht, SHBA ka dislokuar një aeroplanmbajtëse në Karaibe dhe ka kryer goditje ndaj anijeve që i konsideroi pjesë të trafikut të drogës, operacione të cilat sipas ekspertëve të OKB kanë shkaktuar vdekje të shumta dhe përbëjnë ekzekutime jashtëgjyqësore.
Trump ka paralajmëruar gjithashtu se synon të godasë trafikun venezuelian të drogës edhe nga toka, ndërsa Uashingtoni ka dyfishuar shpërblimin për informacion që çon në arrestimin e Maduros, duke e çuar në 50 milionë dollarë. SHBA e ka shpallur të ashtuquajturin Karteli i Diellit si organizatë terroriste, duke akuzuar zyrtarë të lartë venezuelianë për përfshirje në trafikun ndërkombëtar.
Nga ana e tij, Maduro ka reaguar në një fjalim televiziv duke thënë se vendi nuk do të frikësohet dhe duke akuzuar SHBA-në se po kërkon justifikime për një ndërhyrje të re. Raportime të mediave amerikane tregojnë se Tramp dhe Maduro kanë zhvilluar një bisedë telefonike javën e kaluar, megjithëse një takim mes tyre nuk është konfirmuar.
Lëvizja për mbylljen e hapësirës ajrore ka pasoja të menjëhershme: Administrata Federale e Aviacionit në SHBA paralajmëroi kompanitë ajrore për rrezik të shtuar sigurie në Venezuelë, dhe gjashtë prej linjave kryesore të Amerikës së Jugut pezulluan fluturimet drejt vendit. Caracas reagoi duke u hequr kompanive të drejtën e operimit, duke akuzuar ato për bashkëpunim me politikën e ashpër të Uashingtonit.
Ekspertët paralajmërojnë se izolimi ajror i Venezuelës do të përkeqësojë krizën humanitare, duke bllokuar furnizimet kritike dhe duke kufizuar udhëtimet edhe në raste emergjence. Shumë analistë e shohin strategjinë amerikane si një politikë djeg e shkreti që synon të rrëzojë Maduro-n, por që godet më së shumti popullsinë civile.
About the Author
