Në muajin e Pavarësisë, komuniteti shqiptaro-amerikan inauguron rrugën Isa Boletini Way pranë Ismail Qemali Road, duke shënuar një nderim historik për figurat kombëtare.
Në Staten Island të Nju Jorkut do të inaugurohet më 30 nëntor rruga e re Isa Boletini Way, një vendim që përbën një moment krenarie për komunitetin shqiptaro-amerikan. Emri i heroit kombëtar shqiptar do t’i shtohet hartës së një prej qyteteve më të mëdha të botës, pikërisht në muajin kur shqiptarët festojnë Pavarësinë.
Rruga do të vendoset në kryqëzimin midis Father Capodanno Boulevard dhe Seaview Avenue, ku prej vitesh jetojnë dhe veprojnë mijëra shqiptarë. Nisma është rezultat i angazhimit të gjatë të Albanian American Association of Staten Island, me mbështetjen e organizatave të tjera shqiptare në SHBA, përfshirë Federatën Pan-Shqiptare Vatra.
Emërtimi i rrugës Isa Boletini vjen afër një tjetër simboli historik shqiptar në Nju Jork, Ismail Qemali Road, duke krijuar një zonë që tashmë po quhet ne mënyrë joformale lagjja shqiptare. Organizatorët theksojnë se vendosja e këtyre emrave është një mënyrë për të ruajtur dhe promovuar trashëgiminë shqiptare në diasporë, duke i kujtuar brezave të rinj figurat që kanë formësuar historinë e kombit.
Inaugurimi pritet të mbledhë qindra pjesëmarrës, përfaqësues të komunitetit dhe personalitete të njohura shqiptaro-amerikane, në një ngjarje që shënon një tjetër gur themeli në historinë e prezencës shqiptare në Shtetet e Bashkuara.
About the Author
