Charles Feeney shpërndau gjithë pasurinë prej 8 miliardë dollarësh dhe mbajti vetëm dy milionë për një pleqëri modeste
Charles Feeney, biznesmeni irlando-amerikan që kishte bërë betimin të mbaronte jetën pa pasuri, ka përfunduar së dhëni gjithë pasurinë e tij. Në moshën 89-vjeçare, themeluesi i Duty Free Shoppers ka realizuar objektivin që e udhëhoqi për dekada: të jetonte duke dhënë gjithçka.
Feeney ndërtoi perandorinë e tij tregtare në aeroportet e botës, por luksi, ishujt privatë apo vilat madhështore nuk e kanë joshur kurrë. Në vitin 1982 krijoi fondacionin Atlantic Philanthropies, përmes të cilit shpërndau miliarda dollarë në projekte arsimore, shëndetësore dhe në mbrojtje të të drejtave të njeriut. Vetëm për edukimin ai ka kontribuar rreth 3.7 miliardë dollarë, ndërsa 870 milionë të tjera i ka dhënë për kauza sociale.
Për veten e tij ka mbajtur vetëm dy milionë dollarë, mjaftueshëm për një jetë të qetë e modeste në apartamentin e tij të thjeshtë në San Francisko. Feeney njihej për diskrecionin e tij ekstrem, duke bërë që shumë nga donacionet të mbeteshin anonime, madje edhe të ngatërronin institucionet për shkak të mungesës së transparencës së qëllimshme.
Ai besonte se dhurimi duhet bërë gjatë jetës dhe jo pas vdekjes, filozofi që e përmendte shpesh në intervistat e tij, duke theksuar se çdo kontribut i vogël mund të ndryshojë një jetë. Gjatë viteve, historia e tij e jashtëzakonshme tërhoqi vëmendjen dhe respektin e figurave të mëdha të biznesit, përfshirë Warren Buffett dhe Bill Gates, të cilët e kanë cilësuar Feeney-n si një nga modelet më të rralla të filantropisë moderne.
Trashëgimia e tij nuk matet me pasuri, por me jetët që ka prekur dhe me filozofinë e një njeriu që deshi të provonte se edhe një miliarder mund të zgjedhë të mos ketë asgjë, për të dhënë gjithçka.
About the Author
