Bizneset denoncojnë praninë e paprecedentë të policisë, gjoba maksimale dhe mungesë klientësh: “Po na mbyllin me urdhër, rruga po shkon drejt shuarjes”
Rruga ikonë e tregtisë së Tiranës, “Myslym Shyri”, po përjeton ditët më të errëta të historisë së saj ekonomike. Aty ku dikur radhët e klientëve mbushnin trotuaret me çanta blerjesh në duar, sot dominon heshtja, pensionistët dhe kalimtarët sporadikë. Qepenë të mbyllur, tabela “Likuidim total”, “Shitet biznesi”, vitrinat bosh; ky është realiteti i një rruge me mbi 200 dyqane dhe rreth 400 të punësuar, e cila sipas tregtarëve, po shkon drejt falimentimit të qëllimshëm.
Tregtarët: “Policia na mbyt me gjoba. Kanë urdhër të na largojnë klientët”
Sipas dhjetëra bizneseve, situata është përkeqësuar në mënyrë drastike nga prania agresive e Policisë së Shtetit dhe Policisë Bashkiake. Në zonë patrullojnë rreth 10 mjete policie në orare të ndryshme të ditës, ndërsa katër efektivë statikë qëndrojnë pranë segmentit kryesor gjatë gjithë kohës.
Çdo automjet që ndalon vetëm pak minuta për të blerë diçka, gjobitet menjëherë me shumën maksimale 3000 lekë, edhe pse gjoba ligjore për parkim të gabuar varion nga 1000 deri në 3000 lekë.
Tregtarët tregojnë se policët shpesh u thonë qytetarëve dhe bizneseve të njëjtën frazë: “Kemi urdhër.”
Rezultati? Klientët shmangin zonën krejtësisht, duke e shtyrë “Myslym Shyrin” drejt fikjes ekonomike.
Dyshimet: Presion i koordinuar për të favorizuar qendrat tregtare?
Burime për Vala News raportojnë se në qarqet tregtare po qarkullon dyshimi se ky regjim represiv gjobash lidhet me interesat e qendrave tregtare të Tiranës. Sipas tyre, devijimi i klientëve drejt qendrave komerciale, ku parkimi është falas dhe i pakufizuar, mund të jetë arsyeja e vërtetë për këtë kontroll të pazakontë.
Madje, në ditë festash apo fundjava, kur pritet fluks i madh blerësish, numri i patrullave rritet edhe më shumë, duke krijuar një klimë frike dhe penalizimi për qytetarët.
Pyetjet që kërkojnë përgjigje urgjente:
– A është e pranueshme që një nga rrugët me traditën më të vjetër tregtare në vend, të trajtohet si zonë ndalimi ekonomik?
– A është normale që qytetarët të detyrohen të shkojnë në periferi për të bërë blerje, ndërsa rrugët tradicionale të qendrës shuhen?
– A po përdoren forcat e rendit për rend ekonomik, në vend të garantimit të sigurisë publike?
Tregtarët kërkojnë zgjidhje: “Jemi në prag të falimentimit masiv”
Bizneset e “Myslym Shyrit” kërkojnë:
– Rishikim urgjent të politikave të parkimit;
– Krijimin e hapësirave të dedikuara për ndalesa të shpejta;
– Konsultime reale mes Bashkisë, Policisë dhe komunitetit të biznesit.
Ata paralajmërojnë se nëse situata vazhdon kështu, falimentimi masiv është i pashmangshëm dhe atëherë do të jetë tepër vonë për të rikthyer rrugën simbol të tregtisë së Tiranës në gjendjen e saj të dikurshme.
Në pritje të një reagimi zyrtar, tensioni te tregtarët rritet: “Po na shuhen bizneset me urdhër. Myslym Shyri po vdes.”
About the Author
