37-vjeçarja Amie Barnes, në pritje të një operacioni spinal, përdorte medikamente për të përballuar dhimbjet kronike, një mbidozë aksidentale rezultoi fatale.
Amie Barnes, 37 vjeç dhe nënë e tre fëmijëve, u gjet e pajetë në shtëpinë e të dashurit të saj në Lancashire, pasi kishte konsumuar më shumë qetësues sesa duhej për të menaxhuar dhimbjet e forta të shpinës. Ajo ishte në listë pritjeje për ndërhyrje kirurgjikale në shtyllën kurrizore dhe përdorte kombinime medikamentesh për të zbutur dhimbjet e vazhdueshme.
Mbrëmjen para ngjarjes, çifti kishte konsumuar verë dhe një darkë të marrë me vete, përpara se të shkonin në gjumë. Të nesërmen në mëngjes partneri i saj u largua për në punë dhe e përshëndeti Amien, por kur u kthye, e gjeti atë pa shenja jete në shtrat. Fillimisht u dyshua për rrethana të dyshimta, për shkak të gjurmëve të gjakut në fytyrë, por ekspertiza mjeko-ligjore sqaroi se ato ishin rezultat i pozicionit të trupit dhe i faktit se kishte fjetur me pajisjen elektronike (vape) poshtë saj.
Skaneri fillestar nuk zbuloi një shkak të qartë vdekjeje, por analizat toksikologjike treguan praninë e disa llojeve të qetësuesve në organizëm, së bashku me një sasi shumë të vogël alkooli. Asistent-koroneri Richard Taylor deklaroi se, ndonëse çdo ilaç veçmas nuk do të ishte fatal, përdorimi i tyre i kombinuar mund të ketë shkaktuar përgjumje të theksuar dhe depresion të funksioneve vitale.
Mjeku i familjes konfirmoi se Amie ishte paraqitur disa herë për dhimbjet kronike në muajt e fundit dhe kishte marrë receta të ndryshme për të përballuar gjendjen derisa të kryhej operacioni i planifikuar në Salford Royal Hospital. Policia theksoi se nuk u gjet asnjë provë që të sugjeronte përfshirje të ndonjë pale të tretë.
Vdekja e saj ka sjellë trishtim të thellë tek familja, miqtë dhe kolegët, me shumë mesazhe ngushëllimi në rrjetet sociale, duke e kujtuar si një nënë të përkushtuar dhe profesioniste të nderuar në punën si mami në spitalet e Blackpool dhe Preston.
About the Author
