Veshjet e lëkurës u bënë trend kombëtar pas paraqitjeve të liderit, por regjimi tani konfiskon rrobat e qytetarëve që imitojnë pamjen e tij
Korea e Veriut ka ndaluar qytetarët të veshin mantele ose xhaketa lëkure, një prej veshjeve më të preferuara të liderit Kim Jong-un. Ky stil u bë i famshëm pas paraqitjes së tij në televizione në vitin 2019, duke shkaktuar një bum shitjesh dhe prodhimesh të xhaketave prej lëkure dhe imitacioneve në vend.
Fillimisht, xhaketat origjinale importoheshin nga Kina dhe përdoreshin kryesisht nga shtresa e pasur. Më pas prodhues vendas nisën të krijonin versione më të lira prej lëkure artificiale, duke e bërë veshjen të aksesueshme edhe për shtresat e mesme dhe të varfra. Stili u përhap edhe më shumë pasi motra e Kim Jong-un u shfaq me mantel lëkure, duke e kthyer atë në trend popullor.
Por autoritetet vendosën ta ndalojnë përdorimin e tyre duke e konsideruar si mungesë respekti ndaj udhëheqësit suprem. Vetëm aparati i Partisë Punëtore dhe persona të autorizuar mund t’i mbajnë këto veshje. Për të zbatuar urdhrin, ekipet zyrtare kanë nisur konfiskimin e xhaketave të lëkurës në dyqane dhe ndaj qytetarëve që i mbajnë në rrugë.
Regjimi shihet shpesh duke vendosur kufizime të pazakonta në stilin e veshjes, si pjesë e kontrollit të imazhit të liderit dhe kultit të personalitetit në vend.
About the Author
