Raportet ndërkombëtare flasin për një ekzekutim makabër ndaj Jang Song-Thaek, por burime të tjera heqin dyshime mbi vërtetësinë e ngjarjes
Një histori makabre e raportuar në media ndërkombëtare ka shkaktuar tronditje në botë. Sipas burimeve nga AsiaReport, udhëheqësi koreanoverior Kim Jong-Un dyshohet se ka urdhëruar ekzekutimin e xhaxhait të tij, Jang Song-Thaek, duke e hedhur në një kafaz para qindra zyrtarëve, ku më pas do të ishte shqyer për së gjalli nga 120 qen të uritur. Ngjarja thuhet se ka ndodhur në dhjetor të vitit 2013, menjëherë pasi Jang u akuzua për tradhti, korrupsion dhe përpjekje për të marrë kontrollin e sektorit të eksportit të qymyrit.
Raporti pretendon se Jang, së bashku me pesë bashkëpunëtorë të tij, është zhveshur dhe lënë në mëshirë të kafshëve të uritura prej tre ditësh, në një proces ekzekutimi të njohur si quan jue, metodë e përdorur historikisht në disa kultura aziatike si formë ndëshkimi ekstrem. Pretendohet se ekzekutimi ka zgjatur rreth një orë dhe është ndjekur live nga Kim Jong-Un dhe rreth 300 zyrtarë të regjimit.
Megjithatë, burime të tjera ndërkombëtare vënë në pikëpyetje vërtetësinë e kësaj historie. Një bloger i lidhur me Washington Post vuri në dukje se asnjë media kryesore në Korenë e Jugut apo në Kinë nuk e ka konfirmuar raportimin, duke e konsideruar lajmin potencialisht propagandistik ose të ekzagjeruar. Koreja e Veriut njihet për mungesë transparence dhe kontroll total të informacionit, duke e bërë të vështirë verifikimin e ngjarjeve të tilla.
Jang Song-Thaek, dikur një nga figurat më të fuqishme në shtet dhe mentor i Kim Jong-Un pas vdekjes së Kim Jong-Il në 2011, u arrestua publikisht dhe u ekzekutua me procedurë të përshpejtuar më 12 dhjetor 2013. Arrestimi i tij u pasua nga një spastrim i gjerë politik brenda elitës së pushtetit, çka rriti shqetësimet në SHBA dhe Kore të Jugut për lëvizjet e udhëheqjes së re në Pyongyang.
Edhe pse lajmi vazhdon të qarkullojë si një nga historitë më të errëta të regjimit koreanoverior, mungesa e provave të forta lë ende hije dyshimi mbi mënyrën e vërtetë të ekzekutimit të Jang Song-Thaek.
About the Author
