Policia e Dorset heton rrethanat e një ngjarjeje të dyshuar si grabitje që ka përfunduar në vdekje, ndërsa një adoleshent dhe dy burra mbahen në pranga
Një grua në të tetëdhjetat është gjetur e vdekur në shtëpinë e saj në Poole të Dorset më 1 dhjetor, ndërsa policia ka arrestuar tre persona të dyshuar për vrasje dhe grabitje. Ngjarja u raportua nga shërbimi i ambulancës pak para orës 17:00, ndërsa oficerët që mbërritën në vendngjarje vunë re shenja të qarta të një hyrjeje të dhunshme.
Zona u rrethua menjëherë për t’i dhënë mundësi ekipit të krimeve të rënda të zhvillonte hetime të plota. Në vijim të punës hetimore, policia arrestoi tre të dyshuar: një 32-vjeçar nga Verwood, një 30-vjeçar nga Wimborne dhe një adoleshent 16-vjeçar nga Romsey. Të tre po mbahen në paraburgim nën dyshimet për vrasje dhe grabitje.
Vdekja e gruas së moshuar po trajtohet ende si e pashpjeguar, ndërsa hetimet për të zbuluar rrethanat e plota të ngjarjes vazhdojnë. Policia e Dorset u ka bërë thirrje qytetarëve të ndihmojnë me çdo informacion të mundshëm, sidomos atyre që mund të kenë parë lëvizje të dyshimta në Higher Blandford Road, pranë kryqëzimit me Cotton Close, në periudhën 29 nëntor deri 1 dhjetor.
Hetuesit kanë shtuar prezencën policore në zonë për të qetësuar komunitetin dhe për të mbledhur dëshmi shtesë. Oficerët mbeten të gatshëm të flasin me banorët që kanë informacione apo shqetësime lidhur me rastin.
About the Author
