Gjykata pritet të shqyrtojë kërkesën e Këshillit të Ministrave kundër masës së GJKKO, ndërsa SPAK zgjeron hetimet për tenderët publikë
Gjykata Kushtetuese pritet të marrë sot një vendim të rëndësishëm në lidhje me pezullimin nga detyra të zëvendëskryeministres Belinda Balluku, duke vendosur nëse do të hapë ose jo çështjen e ankimuar nga Këshilli i Ministrave kundër masës së sigurisë të vendosur nga GJKKO. Vendimi vjen në një klimë tensioni të fortë institucional, ku përplasja mes qeverisë dhe drejtësisë ka dalë hapur në publik.
Belinda Balluku ndodhet nën hetim nga SPAK për dyshime të korrupsionit dhe shkelje të rënda të procedurave në tendera publikë, ndërsa masa e pezullimit nga detyra dhe ndalimi i daljes jashtë vendit u vendos më 20 nëntor nga Gjykata e Posaçme. Ky vendim ka shkaktuar reagim të fortë nga kryeministri Edi Rama, i cili ka refuzuar ta zbatojë plotësisht, duke mos e shkarkuar zyrtarisht Ballukun, por vetëm duke i hequr të drejtën e firmës dhe duke iu drejtuar Kushtetueses për rrëzimin e masës.
Paralelisht, sot pritet të shqyrtohen edhe ankimet në Gjykatën e Posaçme të Apelit, ku gjyqtarja Miliana Muça do të vendosë për masat e sigurisë ndaj Ballukut dhe dy zyrtarëve të tjerë të lartë, drejtorit të KESH Erald Elezi dhe kreut të ARRSH Gentian Gjyli. Të dy këta të fundit akuzohen për shkelje të barazisë në tendera.
Sipas SPAK, hetimet lidhen fillimisht me procedurat e tenderit të tunelit të Llogarasë dhe lotit të katërt të Unazës së Madhe, ku dyshohet se ka pasur ndikim të paligjshëm në përcaktimin e fituesve. Prokuroria e Posaçme ka bërë të ditur se hetimet janë në zgjerim dhe po analizohen edhe procedura të tjera prokurimi publik.
Vendimi i sotëm i Gjykatës Kushtetuese pritet të ketë ndikim të drejtpërdrejtë jo vetëm në fatin politik dhe institucional të Belinda Ballukut, por edhe në raportin mes pushtetit ekzekutiv dhe sistemit të drejtësisë, në një moment delikat për shtetin e së drejtës dhe procesin e reformës në drejtësi.
About the Author
