Xhixha akuzohet për sigurimin e kushteve për vrasje dhe rol ndërmjetësues në planin për eliminimin e Indrit Dokles
Forcat Operacionale të RENEA kanë arrestuar mëngjesin e kësaj të premteje Alket Xhixhën, gjatë një operacioni të zhvilluar në zonën e Fushë-Kuqes së Kurbinit, në një terren të vështirë pranë lumit. Ai ishte shpallur në kërkim dhe ndaj tij Gjykata e Posaçme kishte caktuar masën e sigurisë arrest me burg për vepra të rënda penale të lidhura me krimin e organizuar.
Sipas Policisë së Shtetit, Alket Xhixha akuzohet për sigurimin e kushteve dhe mjeteve për të kryer vrasje, në kuadër të bashkëpunimit të posaçëm të një grupi të strukturuar kriminal, si dhe për pjesëmarrje aktive në veprimtarinë e këtij grupi. Hetimet e SPAK e lidhin atë drejtpërdrejt me rrjetin kriminal të Ervis Martinajt.
Emri i Xhixhës ka dalë në pah pas dëshmive të të penduarit të drejtësisë, Nuredin Dumani, i cili e ka identifikuar atë si hallkë lidhëse mes tij dhe Ervis Martinajt. Sipas kësaj dëshmie, Xhixha ka luajtur rolin e ndërmjetësit në komunikimet dhe organizimin e takimeve që kishin si qëllim planifikimin e vrasjes së Indrit Dokles, atentat që dyshohet se ishte porositur nga Martinaj, por që përfundimisht nuk u realizua.
SPAK ka dokumentuar se Alket Xhixha ka udhëtuar drejt Kosovës së bashku me persona të tjerë të përfshirë në këtë dosje, për të takuar Nuredin Dumanin dhe për të përcjellë ofertën financiare për atentatin. Sipas hetimeve, Xhixha ishte pjesë aktive e koordinimit dhe komunikimit mes porositësit dhe ekzekutorëve të mundshëm.
Gjatë operacionit të arrestimit, RENEA sekuestroi në ambientet ku fshihej Xhixha armë zjarri tip pistoletë, armë gjahu, municion luftarak pa leje, radio ndërlidhëse të ngjashme me ato të policisë dhe një jelek antiplumb. Të gjitha këto materiale janë marrë në cilësinë e provës materiale.
Alket Xhixha njihet gjithashtu si vëllai i Besian Xhixhës, i dënuar për vrasjen e vëllezërve Haxhia në Durrës, çka sipas hetuesve forcon dyshimet për përfshirjen e tij në rrjete të strukturuara kriminale.
Policia dhe SPAK kanë bërë të ditur se hetimet ndaj Alket Xhixhës vijojnë, ndërsa priten veprime të tjera procedurale për dokumentimin e plotë të rolit të tij në aktivitetet kriminale që lidhen me grupin e Ervis Martinajt.
About the Author
