Sulmuesi egjiptian qëndroi më gjatë në fushë pas fitores ndaj Brightonit, duke përshëndetur tifozët mes zërave për tensione dhe një largim të mundshëm në janar
Liverpooli u rikthye te fitorja në Premier Ligë, duke mposhtur Brightonin me rezultatin 2-0 në “Anfield Road”, por vëmendja pas ndeshjes u përqendrua te Mohamed Salah dhe një gjest që ka nxitur spekulime të forta për të ardhmen e tij në klub.
Sulmuesi egjiptian e nisi takimin nga stoli, por u hodh në fushë që në minutën e 26, pas dëmtimit të Joe Gomez. Prania e tij u ndje menjëherë, pasi Salah kontribuoi në golin e dytë të Liverpoolit, duke asistuar për Hugo Ekitike nga një goditje këndi.
Në përfundim të ndeshjes, Salah qëndroi në fushë më gjatë se bashkëlojtarët, duke përjetuar duartrokitjet e gjata dhe entuziazmin e tifozëve në tribunat e Anfield-it. Ky moment, i interpretuar nga shumëkush si një përshëndetje e veçantë, ka ushqyer zërat se kjo mund të ketë qenë një nga paraqitjet e fundit të tij me fanellën e Liverpoolit.
Sipas raportimeve të mediave britanike, situata e Salah në klub është shoqëruar me tensione, si me trajnerin Arne Slot, ashtu edhe me drejtuesit e Liverpoolit. Këtyre zhvillimeve u shtohet edhe fakti se lojtari pritet të grumbullohet me kombëtaren e Egjiptit për Kupën e Afrikës, ndërsa merkatoja e janarit shihet si një moment kyç për të ardhmen e tij.
Megjithëse nga klubi nuk ka ende një qëndrim zyrtar, gjesti i Salah në Anfield ka mjaftuar për të ndezur dyshime dhe për të hapur një debat të gjerë mes tifozëve dhe analistëve mbi një kapitull që mund të jetë drejt mbylljes.
About the Author
