Aktorja e filmave për të rritur u gjobit simbolikisht dhe u përjashtua nga Indonezia, pas një episodi që autoritetet e cilësuan shkelje të rëndë të rregullave morale dhe rrugore
Bonnie Blue, emri artistik i Tia Billinger, është rikthyer në Mbretërinë e Bashkuar pas dëbimit nga Bali, ku autoritetet indoneziane i vendosën një ndalim hyrjeje për të paktën dhjetë vjet dhe një gjobë simbolike prej 9 paundësh. Ajo mbërriti në aeroportin Heathrow të Londrës të shtunën, duke u shfaqur e buzëqeshur përpara kamerave, në kontrast të fortë me seriozitetin e çështjes që e çoi në largimin e saj nga vendi aziatik.
26-vjeçarja u ndalua javën e kaluar së bashku me disa persona të tjerë, nën akuzat se kishte regjistruar përmbajtje eksplicite, aktivitet i ndaluar rreptësisht nga ligjet morale të Indonezisë. Sipas autoriteteve, ajo kishte përdorur një automjet blu, të njohur si Bangbus, për të promovuar materiale të natyrës seksuale, ndërkohë që mjeti rezultonte pa dokumentacion të rregullt.
Të premten, një gjykatë vendosi përjashtimin e saj nga Bali dhe një gjobë minimale për shkelje të rregullave rrugore, duke shmangur një dënim shumë më të rëndë që, sipas ligjit vendas, mund të arrinte deri në 15 vite burg dhe një gjobë të konsiderueshme financiare. Gjatë seancës, Billinger deklaroi se i kuptonte vendimet e gjykatës dhe pranoi të respektonte ligjin.
Para daljes përpara gjykatës, ajo publikoi në rrjetet sociale një video me formatin get ready with me, duke u përgatitur për seancën, gjest që u interpretua nga shumëkush si provokues dhe shpërfillës ndaj situatës ligjore. Edhe pas vendimit, sjellja e saj vijoi të ishte e njëjtë, me deklarata ironike dhe dalje publike që tërhoqën vëmendjen e mediave ndërkombëtare.
Autoritetet indoneziane kanë bërë të qartë se ndalimi i hyrjes për Bonnie Blue mund të zgjatet edhe më tej, duke theksuar se rasti i saj do të shërbejë si precedent për zbatimin rigoroz të ligjeve që ndalojnë prodhimin dhe shpërndarjen e përmbajtjeve pornografike në vend.
About the Author
