Policia po merr në pyetje një familjar, hetimet trajtohen si vrasje e dyfishtë
Një ngjarje tronditëse ka goditur Hollywoodin, pasi regjisori i njohur amerikan Rob Reiner dhe bashkëshortja e tij Michele Reiner janë gjetur të pajetë në rezidencën e tyre në Los Angeles. Autoritetet kanë konfirmuar se të dy viktimat kanë pësuar plagë nga armë e ftohtë, ndërsa rasti po hetohet zyrtarisht si vrasje.
Departamenti i Zjarrfikësve të Los Angeles u thirr në banesën e çiftit rreth orës 15:30, ku u gjetën trupat e një burri 78-vjeçar dhe një gruaje 68-vjeçare. Burime zyrtare konfirmuan se bëhej fjalë për Rob dhe Michele Reiner. Pas mbërritjes së shërbimeve emergjente, policia u njoftua menjëherë dhe zona u rrethua.
Detektivët e LAPD kanë bërë të ditur se një familjar po merret në pyetje në kuadër të hetimeve, por deri tani nuk ka asnjë person të arrestuar dhe asnjë i dyshuar zyrtar. Autoritetet theksojnë se po merren deklarata nga të gjithë familjarët për të zbardhur rrethanat e ngjarjes.
Sipas burimeve të zbatimit të ligjit, trupat u gjetën me plagë që dyshohet se janë shkaktuar nga thikë. Vajza e çiftit, Romy Reiner, raportohet se ka qenë personi që ka bërë zbulimin e tmerrshëm brenda vilës gjashtëdhomëshe.
Ngjarja ka tronditur jo vetëm familjen, por edhe botën e filmit. Figura të njohura si Billy Crystal dhe Larry David janë parë pranë banesës, dukshëm të prekur emocionalisht. Ndërkohë, drejtues të lartë të policisë kanë deklaruar se shtëpia është lënë e paprekur deri në sigurimin e një urdhri për vijimin e hetimeve.
Rob Reiner ishte një nga regjisorët dhe aktorët më të njohur të kinemasë amerikane, autor i filmave legjendarë si Stand By Me, The Princess Bride, Misery, A Few Good Men dhe When Harry Met Sally. Ai njihej gjithashtu për angazhimin e tij politik dhe shoqëror.
Një zëdhënës i familjes Reiner konfirmoi vdekjet, duke kërkuar privatësi në këtë periudhë jashtëzakonisht të vështirë. Ndërkohë, autoritetet lokale dhe figura politike kanë shprehur ngushëllimet për humbjen e dyfishtë, ndërsa hetimet vijojnë për të zbardhur plotësisht këtë krim që ka tronditur opinionin publik.
About the Author
