Monumenti 40 metra i lartë u përmbys nga erërat mbi 90 km/orë në qytetin Guaiba, pa të lënduar
Një stuhi e fuqishme ka shkaktuar dëme të mëdha në jug të Brazilit, duke rrëzuar një replikë gjigante të Statujës së Lirisë në qytetin Guaiba. Monumenti, rreth 40 metra i lartë, u shemb pasdite, rreth orës 15:00, nën forcën e erërave të forta që goditën zonën.
Statuja ishte vendosur në parkimin e një qendre tregtare të rrjetit Havan, pranë një fast food-i, dhe ishte në përdorim që prej vitit 2020. Pamjet e publikuara tregojnë momentin kur struktura fillimisht përkulet nga era e fortë, për t’u rrëzuar më pas, duke u copëtuar. Koka e statujës u shkatërrua plotësisht nga impakti.
Autoritetet lokale konfirmuan se nuk ka pasur të lënduar, ndërsa zona u izolua menjëherë për sigurinë e qytetarëve. Sipas kompanisë Havan, vetëm pjesa e sipërme e monumentit, rreth 24 metra, u shemb, ndërsa piedestali 11 metra i lartë mbeti i paprekur. Ekipet teknike ndërhynë brenda pak orësh për të larguar mbetjet.
Kryebashkiaku i Guaibas, Marcelo Maranata, vlerësoi reagimin e shpejtë të shërbimeve të emergjencës dhe bashkëpunimin me Mbrojtjen Civile, duke theksuar se situata u vu nën kontroll pa pasoja për njerëzit.
Sipas shërbimit meteorologjik, në zonë u regjistruan erëra mbi 90 kilometra në orë, ndërsa paralajmërime emergjente për mot ekstrem ishin dërguar paraprakisht në telefonat e banorëve. Stuhia preku edhe rajone të tjera të shtetit Rio Grande do Sul, ku u raportuan çati të dëmtuara, pemë të rrëzuara, ndërprerje energjie dhe përmbytje të pjesshme të rrugëve.
Autoritetet njoftuan se do të kryhet një inspektim teknik për të përcaktuar shkaqet e sakta të shembjes dhe për të verifikuar nëse, përveç kushteve ekstreme të motit, ka pasur edhe faktorë të tjerë ndikues. Kushtet atmosferike pritet të përmirësohen gradualisht, megjithëse reshje të lehta shiu mund të vijojnë edhe në ditët në vijim.
About the Author
