Shefi i NATO-s Mark Rutte flet për kërcënimin rus, ndërsa një specialist sigurie përshkruan pasojat shkatërruese që një konflikt global mund të ketë në territorin britanik
Britania e Madhe mund të përballet me luftë brenda pesë viteve të ardhshme, ka paralajmëruar sekretari i përgjithshëm i NATO-s, Mark Rutte, duke ngritur alarmin për atë që cilësohet si kërcënimi më i madh ushtarak i një brezi të tërë. Sipas tij, Rusia ka intensifikuar fushatën e fshehtë kundër shoqërive perëndimore dhe po teston qëndrueshmërinë politike, ekonomike dhe ushtarake të vendeve të NATO-s.
Deklaratat e Rutte vijnë në një klimë tensioni të lartë për shkak të luftës në Ukrainë, ndërsa Moska ka paralajmëruar se do të reagojë ndaj çdo veprimi që e konsideron armiqësor, përfshirë praninë e forcave europiane në Ukrainë apo konfiskimin e aseteve ruse. Paralelisht, propagandistë rusë kanë kërcënuar hapur Britaninë me sulm bërthamor, duke e cilësuar praninë ushtarake britanike në Ukrainë si shkak të drejtpërdrejtë për përshkallëzim ekstrem.
Profesori Anthony Glees, specialist i sigurisë dhe inteligjencës në Universitetin e Buckingham, ka përshkruar një skenar të zymtë për mënyrën se si mund të zhvillohet Lufta e Tretë Botërore në tokën britanike. Sipas tij, nëse konflikti do të ishte bërthamor, gjithçka do të përfundonte brenda pak orësh pa fitues, vetëm me shkatërrim total. Megjithatë, ai beson se një luftë konvencionale është më e mundshme dhe se shenjat e para të saj tashmë kanë nisur.
Sipas parashikimit të tij, faza e parë do të përfshinte kërcënime, sabotime dhe përpjekje për destabilizim politik, me synim përçarjen e shoqërisë britanike dhe dobësimin e demokracisë. Në fazën e dytë, konflikti do të shndërrohej në një luftë konsumimi mes Rusisë dhe NATO-s, me pasoja të rënda për jetën e përditshme në Britani. Furnizimet me ushqime do të shteronin brenda ditësh, sulmet kibernetike do të paralizonin bankat, energjinë dhe shërbimet bazë, ndërsa karburanti dhe medikamentet do të bëheshin pothuajse të paarritshme.
Profesori paralajmëron se do të vendosej racionimi i ushqimeve, ndalimqarkullimi gjatë natës, ndërprerje energjie dhe thirrje e detyrueshme ushtarake për të rriturit nga 18 deri në 40 vjeç. Në skenarin më ekstrem, nëse Rusia do të triumfonte, ai parashikon vendosjen e një qeverie pro-ruse në Londër, largimin e Familjes Mbretërore dhe shndërrimin e Britanisë në një shtet nën kontrollin e Moskës, me polici sekrete dhe kampe pune për kundërshtarët.
Paralajmërimet kanë shtuar presionin mbi qeverinë britanike për rritje të kapaciteteve mbrojtëse dhe demonstrim të forcës ushtarake, ndërsa frika për një përplasje globale po kthehet gjithnjë e më shumë nga skenar teorik në rrezik real për Europën dhe Mbretërinë e Bashkuar.
About the Author
