Opozita paralajmëron valë protestash dhe kërkon qeveri teknike pas zgjedhjeve të kontestuara të 11 majit
Partia Demokratike do të zhvillojë pasditen e 22 dhjetorit një protestë kombëtare kundër qeverisë Rama, duke shënuar kështu tubimin e parë të madh opozitar pas zgjedhjeve parlamentare të 11 majit. Opozita e drejtuar nga Sali Berisha i konsideron këto zgjedhje si të manipuluara dhe një farsë elektorale që, sipas saj, nuk reflekton vullnetin real të qytetarëve.
Protesta është planifikuar të nisë në orën 18:00 në bulevardin Dëshmorët e Kombit dhe pritet të jetë fillimi i një serie tubimesh që, sipas kreut demokrat, do të çojnë në rrëzimin e Edi Ramës nga posti i kryeministrit. PD kërkon krijimin e një qeverie teknike që do të përgatisë vendin për zgjedhje të parakohshme parlamentare.
Ndërkohë, në rrjetet sociale është publikuar edhe slogani zyrtar i protestës. Mesazhi Poshtë Edi Rama shoqërohet me një imazh të kryeministrit të paraqitur me kokë poshtë, duke synuar mobilizimin e qytetarëve për pjesëmarrje masive në protestë.
Edi Rama siguroi më 11 maj 83 mandate deputetësh, duke i dhënë mazhorancës një shumicë të fortë në Kuvend dhe mandatin e katërt radhazi qeverisës. Megjithatë, opozita vijon të kundërshtojë rezultatin dhe legjitimitetin e procesit zgjedhor.
Deri më tani, Partia Demokratike ka organizuar disa protesta të vogla pranë zyrës së kryeministrit, të cilat janë zhvilluar në formën e foltoreve qytetaro parlamentare, ku deputetë dhe qytetarë kanë mbajtur fjalime kritike ndaj qeverisë. Protesta e 22 dhjetorit pritet të jetë testi i parë i madh i mobilizimit opozitar në nivel kombëtar.
About the Author
