Prokuroria e Posaçme nuk miraton pjesëmarrjen e kryebashkiakut të arrestuar në diskutimin dhe votimin e projektbuxhetit të Tiranës
Prokuroria e Posaçme Kundër Korrupsionit dhe Krimit të Organizuar nuk i ka dhënë leje kryebashkiakut të Tiranës, Erion Veliaj, që të marrë pjesë fizikisht në mbledhjen e Këshillit Bashkiak ku pritet të diskutohet dhe miratohet buxheti i vitit 2026 për kryeqytetin.
Vendimi vjen pas kërkesës zyrtare të bërë nga Këshilli Bashkiak i Tiranës, i cili argumentonte se pjesëmarrja e kryetarit të bashkisë në procesin e konsultimit dhe detajimit të buxhetit përbën një detyrim ligjor të parashikuar nga legjislacioni për vetëqeverisjen vendore. Sipas këshillit, prania e Veliajt do të garantonte bashkëpunimin institucional dhe transparencën në një proces me interes të drejtpërdrejtë publik.
Megjithatë, SPAK ka vendosur të mos e miratojë këtë kërkesë, duke mos lejuar daljen apo pjesëmarrjen fizike të Veliajt në mbledhjen e këshillit. Ky vendim lë në fuqi masat kufizuese ndaj kryebashkiakut, i cili ndodhet në paraburgim që prej 10 shkurtit, pas vendimit të Gjykatës së Posaçme për masën e sigurisë arrest në burg.
Dy ditë më parë, Veliaj i ishte drejtuar Këshillit Bashkiak me një letër, ku kërkonte që mendimi i tij të merrej parasysh përpara miratimit të buxhetit të vitit 2026. Ai kishte argumentuar se miratimi i buxhetit pa konsultim me kryetarin e zgjedhur përbën devijim nga standardet e qeverisjes vendore dhe cenon realizimin e mandatit të tij demokratik.
Erion Veliaj akuzohet nga SPAK për disa vepra penale, përfshirë korrupsion pasiv, pastrim parash, mosdeklarim pasurie dhe shpërdorim detyre, akuza që ai i ka mohuar, duke i cilësuar të pabazuara në prova.
Mbledhja e Këshillit Bashkiak për buxhetin 2026 pritet të zhvillohet pa praninë fizike të kryebashkiakut, ndërsa debati mbi rolin e tij në këtë proces mbetet i hapur në planin politik dhe institucional.
About the Author
