Wang Kun u shua vetëm pak ditë pasi u tha fansave se ishte gati për një fillim të ri në jetë dhe karrierë
Bota e fitnessit dhe bodybuildingut është tronditur nga vdekja e papritur e kampionit kinez Wang Kun, i cili u nda nga jeta në moshën 30-vjeçare, dyshohet si pasojë e një problemi në zemër. Lajmi ka shkaktuar reagime të shumta mes sportistëve dhe ndjekësve të tij, duke e konsideruar humbjen si një goditje të rëndë për këtë disiplinë sportive.
Wang Kun ishte një nga emrat më të njohur të bodybuildingut në Kinë, ku kishte dominuar për vite me radhë skenën kombëtare. Ai kishte fituar tetë tituj radhazi në Kampionatin Kombëtar të Bodybuildingut CBBA, një arritje e rrallë që e kishte kthyer në figurë ikonike të këtij sporti. Po ashtu, ai ishte atlet profesionist i Federatës Ndërkombëtare të Bodybuildingut dhe Fitnessit në ligën profesionale.
Shoqata Provinciale e Bodybuildingut në Anhui, përmes një deklarate të shkurtër, bëri me dije se ndarja e parakohshme nga jeta e sportistit duket se lidhet me një problem kardiak. Megjithatë, detajet e plota rreth rrethanave të vdekjes nuk janë bërë ende publike.
Wang njihej për disiplinën ekstreme dhe stilin rigoroz të jetesës. Ai kishte treguar se për rreth dhjetë vite kishte jetuar një jetë të izoluar dhe të përkushtuar vetëm sportit, duke ndjekur dieta strikte dhe duke kaluar edhe festat tradicionale në palestër, larg pushimeve apo festimeve familjare.
Përveç karrierës sportive, ai ishte edhe sipërmarrës. Wang drejtonte palestrën Muscle Factory në qytetin e tij të lindjes, e cila kishte krijuar një komunitet të gjerë ndjekësish. Së fundmi, ai ishte në prag të hapjes së një palestre të re në Hefei, një projekt që e shihte si fillimin e një kapitulli të ri në jetën e tij.
Vetëm pak ditë para vdekjes, Wang Kun kishte ndarë me ndjekësit e tij një mesazh optimist, ku shprehej se një pikë e re nisjeje ishte përpara syve të tij. Fatkeqësisht, ky fillim i ri nuk do të realizohet kurrë.
Pas lajmit tragjik, rrjetet sociale janë mbushur me mesazhe ngushëllimi dhe homazhe nga fansa dhe kolegë të sportit, të cilët e kujtojnë Wang Kun si kampion, por edhe si një njeri të përkushtuar dhe frymëzues.
About the Author
