Boeing 737-200 i humbur nga Air India u zbulua i braktisur në aeroportin e Kolkatës, me detyrime parkimi rreth 85 mijë paund
Një histori e pazakontë ka dalë në dritë në Indi, ku një avion pasagjerësh Boeing 737-200, i konsideruar i zhdukur prej më shumë se një dekade, është gjetur më në fund i braktisur në aeroportin e Kolkatës. Linja ajrore Air India ka pranuar se kishte humbur gjurmët e avionit që nga viti 2012 dhe tani është detyruar të paguajë një gjobë të konsiderueshme për parkimin e tij shumëvjeçar.
Avioni, me peshë rreth 30 tonë dhe gjatësi 30 metra, kishte dalë nga regjistrat zyrtarë të kompanisë për shkak të mungesës së dokumentacionit dhe ndryshimeve të shumta administrative ndër vite. Vetëm pasi autoritetet e aeroportit kontaktuan Air India për ta larguar mjetin ajror, u zbulua se ai i përkiste linjës ajrore.
Fillimisht, kompania mohoi pronësinë, por një auditim i brendshëm konfirmoi se bëhej fjalë për një avion të saj, i cili ishte regjistruar fillimisht nën Indian Airlines, kompani shtetërore që u bashkua me Air India në vitin 2007. Më pas, avioni ishte dhënë me qira për shërbimet postare të Indisë dhe ishte shndërruar në avion transporti mallrash, përpara se të çregjistrohej në vitin 2012.
Për shkak të qëndrimit 13-vjeçar në pistë, Air India u ngarkua me një faturë prej afro 10 milionë rupi indiane, rreth 85 mijë paund, që përfshin tarifa parkimi dhe shërbimesh aeroportuale. Autoritetet konfirmuan se shuma është shlyer nga kompania.
Avioni 43-vjeçar u largua nga aeroporti dy javë më parë dhe u transportua me rrugë tokësore drejt Bengalurusë, ku do të përdoret për trajnimin e ekuipazheve në tokë. Sipas zyrtarëve, ky është avioni i 14-të i braktisur që është hequr nga aeroporti i Kolkatës gjatë pesë viteve të fundit, ndërsa edhe dy avionë të tjerë të papretenduar vijojnë të qëndrojnë aty prej vitesh.
Rasti ka nxitur diskutime mbi menaxhimin dhe kontrollin e flotës ajrore, duke vënë në pah se si mungesa e dokumentacionit dhe riorganizimet institucionale mund të çojnë në situata absurde, ku një avion pasagjerësh mund të humbasë për më shumë se një dekadë pa u vënë re.
About the Author
