Trupa e Prokurorisë së Posaçme paraqitet në Këshillin e Mandateve dhe Imunitetit për shqyrtimin e kërkesës ndaj zëvendëskryeministres
Prokurorët e Prokurorisë së Posaçme kundër Korrupsionit dhe Krimit të Organizuar kanë mbërritur në ambientet e Kuvendit, ku pritet të shqyrtohet kërkesa për heqjen e imunitetit të deputetes dhe zëvendëskryeministres Belinda Balluku.
Mbërritja e përfaqësuesve të SPAK shënon nisjen formale të procesit në Këshillin e Mandateve dhe Imunitetit, i cili po zhvillon një mbledhje me dyer të mbyllura për mediat. Prokurorët do të paraqesin argumentet ligjore dhe kërkesën zyrtare përpara anëtarëve të këshillit parlamentar.
Kjo seancë konsiderohet një moment kyç në procedurën institucionale, pasi nga vendimmarrja e Këshillit dhe më pas e Kuvendit do të varet vijimi ose jo i hapave të mëtejshëm ligjorë ndaj Ballukut.
Çështja ka ngjallur interes dhe tension të lartë politik, duke vendosur përballë drejtësinë dhe mazhorancën parlamentare, në një proces që pritet të ndikojë ndjeshëm në zhvillimet politike dhe institucionale të ditëve në vijim.
About the Author
