Anthony Joshua fiton përballjen e shumëpritur në Miami ndaj Jake Paul, ndërsa kampi i britanikut hedh sytë drejt një superdueli të mundshëm me Tyson Fury.
Anthony Joshua doli fitues nga përballja spektakolare ndaj Jake Paul në Kaseya Center në Miami, duke e mbyllur duelin në raundin e gjashtë pas një goditjeje të fuqishme që e detyroi amerikanin të ndalojë dhe të kërkojë ndihmë mjekësore. Ndeshja, e zhvilluar në peshën e rëndë dhe jashtë titujve botërorë, u ndoq me interes të jashtëzakonshëm për shkak të përplasjes mes një ish-kampioni bote dhe një influencuesi të kthyer në boksier.
Anthony Joshua u shfaq i kujdesshëm në raundet e para, duke pranuar më pas se mungesa e ringut prej më shumë se një viti ishte ndier. Megjithatë, me kalimin e minutave, britaniku rriti ritmin dhe në raundin e gjashtë gjeti goditjen vendimtare që e rrëzoi kundërshtarin dhe i dha fund ndeshjes.
Jake Paul tregoi rezistencë dhe guxim, duke arritur të qëndrojë në këmbë për gjashtë raunde përballë një prej emrave më të mëdhenj të peshës së rëndë. Pas ndeshjes, ai u dërgua në spital për kontrolle mjekësore dhe pritet të qëndrojë disa javë jashtë ringut për rikuperim. Paul deklaroi se nuk ishte i zhgënjyer nga paraqitja e tij dhe se synon të vazhdojë karrierën në kategori më të ulëta peshe.
Fitorja e Joshuas u shoqërua menjëherë me spekulime për hapin e radhës në karrierën e tij. Promotori Eddie Hearn dhe vetë boksieri britanik nuk e fshehën dëshirën për një përballje gjigante me Tyson Fury, edhe pse një duel i tillë mbetet i pasigurt për shkak të situatës aktuale të Furyt dhe planeve të tjera në peshën e rëndë.
Ndeshja në Miami, e cilësuar nga disa si spektakël më shumë se duel sportiv, arriti megjithatë të mbajë vëmendjen globale dhe të rikthejë në qendër të skenës emrin e Anthony Joshuas, i cili tani synon rikthimin në elitën e vërtetë të boksit botëror.
About the Author
