Kryebashkiaku i Shkodrës del zyrtarisht i pandehur, mes dyshimeve për shpërdorim detyre dhe ndarje të dyshimtë fondesh në një tender energjetik me vlerë 832 mijë euro.
Kryebashkiaku i Shkodrës, Benet Beci, u paraqit këtë të premte për herë të fundit në ambientet e SPAK, ku qëndroi rreth dy orë në pyetje. Pas përfundimit të seancës, ai u informua se hetimet ndaj tij janë mbyllur dhe se tashmë është formalisht i pandehur.
Sipas dosjes hetimore, Beci akuzohet për shpërdorim detyre në lidhje me një tender të realizuar nga KESH për zhvillimin e sektorit energjetik, me vlerë totale 832 mijë euro. Procedura i përket vitit 2019 dhe lidhet drejtpërdrejt me bashkëshorten e ish-kreut të ARRSH-së, Evis Berberi.
Hetimet e SPAK nisën pas sekuestrimit të telefonave të Berberit dhe bashkëshortes së tij, ku u zbuluan komunikime të shumta me Benet Becin. Në një prej mesazheve, sipas prokurorisë, Beci merrte informacion të detajuar për ndarjen e fondeve të tenderit, ku rreth 500 mijë euro ishin parashikuar për profesorë të Harvard University, ndërsa mbi 320 mijë euro për përfitues vendorë, të cilët në komunikime përshkruheshin në mënyrë ironike si persona me dy klasë shkollë.
Tenderi, i shpallur në janar 2020, u fitua nga kompania Consulting & Management Albania SHPK, e drejtuar nga biznesmeni Ervis Myftari. SPAK dyshon se procedura mund të jetë manipuluar dhe se fondet janë përdorur për skema përfitimi dhe pastrim parash, duke ngritur pikëpyetje serioze mbi transparencën dhe ligjshmërinë e kontratës.
Dosja vjen pas një periudhe të gjatë hetimesh dhe disa paraqitjesh të Becit në SPAK gjatë vitit të kaluar. Megjithëse autoritetet nuk kanë dhënë ende një njoftim zyrtar të detajuar për akuzat përfundimtare, burime pranë hetimit flasin për përfshirjen e tij në një skemë më të gjerë korrupsioni që prek nivele të larta të administratës publike.
Çështja pritet të kalojë në fazën gjyqësore, ndërsa dosja Berberi–Beci po shihet si një tjetër test i rëndësishëm për hetimet e SPAK ndaj zyrtarëve të lartë dhe mënyrës se si janë shpërndarë fondet publike në projekte me vlera të larta financiare.
About the Author
