Aktivitetet e përditshme si leximi, bisedat dhe angazhimi social ndihmojnë trurin, ndërsa orët e gjata para televizorit apo lojërat elektronike mund të kenë efekt të kundërt.
Studime të reja shkencore po hedhin dritë mbi ndikimin që hobit dhe zakonet e përditshme kanë në shëndetin e trurit dhe rrezikun për zhvillimin e demencës. Një kërkim i realizuar nga University of South Australia ka analizuar aktivitetet ditore të 397 të rriturve të moshuar gjatë periudhave 24-orëshe, për të kuptuar se si sjelljet e zakonshme lidhen me funksionet njohëse.
Rezultatet sjellin një mesazh inkurajues për ata që lexojnë rregullisht, merren me punë artizanale, bisedojnë shpesh me të tjerët, dëgjojnë muzikë apo praktikojnë aktivitete shpirtërore. Këto forma angazhimi rezultojnë të dobishme për funksionimin e trurit dhe mund të ndihmojnë në uljen e rrezikut të rënies njohëse me kalimin e moshës.
Në anën tjetër, studimi tregon se disa sjellje sedentare, si shikimi i televizorit për periudha të gjata ose lojërat elektronike, lidhen me efekte negative në shëndetin mendor. Sipas studiuesve, nuk është vetëm fakti që qëndrojmë ulur ai që ka rëndësi, por mënyra se si e përdorim atë kohë.
Demenca përfshin një grup simptomash që lidhen me përkeqësimin progresiv të funksioneve të trurit, duke ndikuar në kujtesë, të menduar dhe sjellje. Sipas të dhënave të NHS, rreth një milion persona në Mbretërinë e Bashkuar jetojnë aktualisht me demencë, me rrezikun që rritet ndjeshëm pas moshës 65 vjeç.
Studiuesit theksojnë se lëvizja fizike mbetet thelbësore për shëndetin e përgjithshëm, por sugjerojnë edhe një qasje më të balancuar. Edhe ndryshime të vogla, si zëvendësimi i disa minutave shikim televizori me lexim apo një shëtitje të shkurtër, mund të kenë përfitime afatgjata për trurin.
Në prag të periudhave festive, ekspertët këshillojnë që aktivitetet pasive të ndërpriten herë pas here me lëvizje fizike ose angazhim mendor, duke ndërtuar gradualisht zakone më të shëndetshme që mbështesin funksionet njohëse dhe cilësinë e jetës.
About the Author
