Ish-kampioni i peshave të rënda e nokauton në raundin e gjashtë në Miami, influencuesi pranon se pësoi fraktura në dy vende
Ndeshja mes Jake Paul dhe Anthony Joshua, e zhvilluar në Kaseya Center në Miami, përfundoi me pasoja të rënda për influencuesin amerikan, i cili u dërgua në spital pas një nokauti shkatërrues në raundin e gjashtë.
Joshua dominoi duelin e peshave të rënda, duke e rrëzuar Paulin katër herë përpara se të mbyllte ndeshjen me një goditje të fortë me të djathtën. Pas humbjes, Paul publikoi në rrjetet sociale një radiografi ku tregonte se nofulla i ishte thyer në dy vende, duke siguruar ndjekësit se gjendja e tij ishte stabile dhe po merrte trajtimin e nevojshëm.
Pavarësisht se rezistoi më gjatë nga sa ishte parashikuar, Paul u lodh ndjeshëm pas goditjeve të njëpasnjëshme, ndërsa Joshua tregoi përvojën dhe forcën e një ish-kampioni bote. Kjo shënon humbjen e dytë në karrierën e Paulit dhe të parën me nokaut.
Në deklaratat pas ndeshjes, Joshua vlerësoi këmbënguljen e kundërshtarit, duke theksuar se boksi nuk është vetëm fizik, por edhe psikologjik, dhe se çdo gabim në ring mund të kushtojë shtrenjtë. Ai pranoi gjithashtu se performanca e tij nuk ishte më e mira, por se objektivi ishte të fitonte bindshëm.
Me këtë fitore, Joshua përmirëson bilancin e tij në 29 fitore dhe 4 humbje dhe sinjalizon se synimi i radhës është një përballje e madhe me Tyson Fury, ndërsa për Jake Paul beteja më e afërt mbetet rikuperimi nga dëmtimi serioz.
About the Author
