Gjesti i diskutueshëm në rrjetet sociale i kushton kurorën për Miss Finland 2025
Një foto e publikuar në rrjetet sociale ka shkaktuar reagime të forta dhe akuza për racizëm ndaj përfaqësueses së Finlandës në Miss Universe 2025, Sarah Dzafce. Skandali shpërtheu pasi në imazh ajo shfaqej duke tërhequr lëkurën në cepat e syve, një gjest që u interpretua si fyes ndaj komunitetit aziatik.
Sipas raportimeve të Associated Press, fotografia u bë virale në fund të muajit të kaluar dhe shoqërohej me një mbishkrim që u konsiderua diskriminues. Reagimet nuk u kufizuan vetëm në Finlandë, por u përhapën edhe në vende të Azisë, duke ushtruar presion të fortë mbi institucionet dhe organizatorët e konkursit të bukurisë.
Dzafce, e cila ishte kurorëzuar Miss Finland në muajin shtator, deklaroi për mediat finlandeze se gjesti ishte keqkuptuar dhe se ajo po përpiqej të lehtësonte një dhimbje koke. Ajo shtoi se fotografia ishte ndarë nga një mikeshë pa dijeninë e saj dhe se mbishkrimi nuk ishte shkruar prej saj.
Megjithatë, reagimi publik nuk u zbut. Pas disa ditësh heshtjeje, Dzafce publikoi një ndjesë në rrjetet sociale, ku theksoi se kurrë nuk kishte pasur qëllim të lëndonte apo fyente askënd. Ajo shkroi se titulli Miss Finland nuk ishte vetëm një kurorë, por edhe një përgjegjësi për mënyrën se si flet dhe vepron në publik.
Pavarësisht ndjesës, organizata Miss Finland mori vendimin për t’ia hequr titullin Miss Finland 2025, i njohur në vend si Miss Suomi. Vendimi u konsiderua nga organizatorët si i nevojshëm për të ruajtur vlerat dhe imazhin e konkursit, ndërsa rasti ka hapur një debat të gjerë mbi racizmin, përgjegjësinë publike dhe ndikimin e rrjeteve sociale në jetën e figurave publike.
About the Author
