Transportuesi me rikshë Gobinda Biswas u sulmua publikisht pasi u përhapën thashetheme se ishte i lidhur me shërbimet indiane të inteligjencës
Një tjetër episod dhune ndaj pakicës hindu është regjistruar në Bangladesh, vetëm pak ditë pas vrasjes brutale të një qytetari hindu në Mymensingh. Këtë herë, viktimë ka qenë një transportues me rikshë i quajtur Gobinda Biswas, i cili u sulmua nga një turmë në distriktin Jhenaidah, në rajonin Khulna.
Sipas autoriteteve lokale dhe pamjeve që po qarkullojnë gjerësisht në rrjetet sociale, dhuna nisi pasi disa persona vunë re një fije të kuqe në kyçin e dorës së Biswas, një simbol fetar i zakonshëm për hindutë. Pas kësaj, u përhapën thashetheme se ai ishte i lidhur me shërbimin sekret indian, Research and Analysis Wing, çka nxiti grumbullimin e turmës dhe sulmin ndaj tij.
Video të publikuara online tregojnë Biswas duke iu lutur policisë, ndërsa shoqërohej nga efektivët, duke këmbëngulur se ishte thjesht një punëtor rikshe dhe se nuk kishte asnjë lidhje me agjenci të huaja. Në pamje shihet gjithashtu një person nga turma që përpiqet ta nxjerrë me forcë nga duart e policisë, në mes të rrugës, duke nxjerrë në pah mungesën e kontrollit dhe tensionin e situatës.
Autoritetet konfirmuan se Biswas u dërgua në komisariatin e Jhenaidah Sadar për verifikime të mëtejshme. Një zyrtar policor deklaroi se hetimet paraprake tregojnë se ai kishte jetuar për disa vite në Indi, ndërsa po shqyrtohen pretendimet për kontakte telefonike dhe transaksione të dyshuara, pa dhënë detaje shtesë.
Ngjarja ka rritur edhe më shumë shqetësimet ndërkombëtare për sigurinë e pakicave fetare në Bangladesh. Ministry of External Affairs e Indisë ka shprehur më herët shqetësim të fortë ndaj autoriteteve bangladeze për sulmet e fundit ndaj komunitetit hindu, duke kërkuar që autorët e dhunës të nxirren përpara drejtësisë.
Incidenti i Jhenaidah vjen në një klimë të tensionuar sociale dhe politike, ku dhuna e turmave dhe përhapja e thashethemeve po kthehen në rrezik real për jetën dhe sigurinë e pakicave në vend.
About the Author
