Operacion i Policisë Helenike në Atikë zbulon trafik droge në shkolla, dhunë, kërcënime dhe hierarki të fortë kriminale
Detaje të reja kanë dalë në dritë nga një operacion i gjerë i Policisë Helenike, i cili ka çuar në goditjen e një rrjeti të strukturuar kriminal të trafikimit të drogës që vepronte në zonën e Atikës, duke përfshirë edhe të mitur në aktivitetin e paligjshëm.
Operacioni u zhvillua të enjten, më 18 dhjetor, dhe përfundoi me arrestimin e 12 personave, gjashtë prej të cilëve të mitur. Paralelisht, autoritetet greke kanë identifikuar edhe shtatë persona të tjerë, të cilët janë shpallur në kërkim.
Sipas dosjes hetimore, rrjeti funksiononte me një hierarki të qartë dhe rregulla të rrepta disiplinore. Drejtuesi i dyshuar i grupit është një 20-vjeçar i huaj, i njohur me nofkën Fratelo, ndërsa krahu i tij i djathtë ishte një 19-vjeçar grek me pseudonimin Zoumbo. Anëtarë të tjerë të rrjetit identifikoheshin me emra të koduar si Kontos, Pipis dhe Nitse.
Një park në zonën e Patission ishte shndërruar në pikën kryesore të takimeve dhe koordinimit të grupit, e koduar mes anëtarëve me emrin Kitsou, ku caktoheshin detyrat dhe jepeshin udhëzime operative.
Hetimet tregojnë se komunikimi mes anëtarëve kryhej kryesisht përmes Instagram dhe aplikacionit Signal. Droga e shpërndarë ishte kryesisht kanabis dhe kokainë, me çmime të përcaktuara rreth 10 euro për gram kanabis dhe 50 euro për gram kokainë. Autoritetet kanë dokumentuar të paktën 263 transaksione droge.
Veçanërisht shqetësues janë dialogët e përgjuar mes drejtuesve të rrjetit dhe të miturve, ku evidentohen kërcënime, shantazhe dhe urdhra për shpërndarje droge edhe gjatë orarit shkollor. Në disa raste, drejtuesit kërkonin dorëzimin e parave nën kërcënimin e dhunës, ndërsa në të tjera negocionin sasi dhe çmime, madje edhe oferta speciale.
Sipas policisë, rrjeti aplikonte dënime të ashpra për shkelje të rregullave, përfshirë rrahje, gjoba dhe akte poshtërimi. Disa prej këtyre akteve regjistroheshin dhe shpërndaheshin në rrjete sociale, ku të mitur shfaqeshin duke u keqtrajtuar për të shërbyer si shembull për të tjerët.
Droga shpërndahej në disa shkolla të zonave Nea Filadelfia, Nea Halkidona dhe Ano Patissia, si dhe në rrethinat e tyre. Në një episod të dokumentuar, dy të mitur transportuan drogë gjatë një ekskursioni shkollor në Hania.
Hetimet zbuluan gjithashtu se anëtarët e rrjetit diskutonin skema për pastrimin e parave përmes kompanive të basteve, me qëllim që fitimet nga aktiviteti kriminal të maskoheshin si të ardhura nga lojërat e fatit.
Ndaj të arrestuarve janë ngritur akuza për krijim dhe pjesëmarrje në organizatë kriminale me qëllim trafikimin e drogës dhe përfitim financiar të paligjshëm. Po ashtu, janë arrestuar edhe pesë persona me përgjegjësi prindërore për të miturit e përfshirë, të akuzuar për neglizhencë në mbikëqyrje.
About the Author
