Kreu i ri i Prokurorisë së Posaçme vlerëson guximin e Altin Dumanit dhe shpall prioritet forcimin e hetimeve cilësore dhe besimit të publikut
Kreu i ri i Prokurorisë së Posaçme, Klodian Braho, mbajti fjalën e tij gjatë ceremonisë zyrtare të kalimit të detyrës nga Altin Dumani, duke theksuar se mbrojtja e pavarësisë së SPAK dhe forcimi i besimit të qytetarëve do të jenë në qendër të mandatit të tij.
Braho vlerësoi kontributin e paraardhësve në ndërtimin dhe konsolidimin e institucionit, duke përmendur rolin e Arben Kraja në hedhjen e themeleve të para dhe guximin e Altin Dumanit në forcimin e figurës së SPAK dhe rritjen e besimit publik. Sipas tij, struktura e posaçme ka përballuar presione të konsiderueshme, por ka arritur të qëndrojë falë profesionalizmit dhe integritetit të prokurorëve.
Kreu i SPAK nënvizoi se mbështetja e partnerëve ndërkombëtarë ka qenë dhe mbetet thelbësore për funksionimin e institucionit, duke ndihmuar në forcimin e kapaciteteve dhe në garantimin e pavarësisë së hetimeve. Ai theksoi se respektimi i Kushtetutës dhe standardeve ligjore është një angazhim i panegociueshëm për drejtimin e ri.
Sipas Brahos, fokusi kryesor do të jetë forcimi i funksionimit të brendshëm të SPAK, thellimi i hetimeve cilësore dhe garantimi i pavarësisë së prokurorëve të posaçëm. Ai theksoi se misioni i SPAK shkon përtej mandateve individuale dhe se institucioni do të vijojë të funksionojë si një skuadër e bashkuar, me synimin për të përmbushur pritshmëritë e qytetarëve dhe për të forcuar shtetin e së drejtës.
About the Author
